DîplomasîParlamentera DEM Partî ya Amedî Ceylan Akça ke beşdarê Konferansê Emnîyetê yê Munîhî bîye, vat ke çîyo ke kurdan konferansî de kerd dîplomasîyê pawitişê şarê kurdî bi û ganî kurdî dîplomasîyê xo xurtêr bikerê.
Konferansê Ewleyî yê Munîhî yo 62. şaristanê Munîhî yê Almanya de mabênê 13 û 15ê sibate de ame kerdene. Konferans bi beşdarîya nêzdîyê 120 welatan û 450 temsîlkaranê înan ê payeberz ra ame kerdene. Konferansî de rojevê ewleyî yo global ame munaqeşakerdene û dînamîkanê sîyasî û ewleyî yê Sûrîye de munaqeşayî hîrayî ameyê kerdene. Averşîyayîşanê tewr muhîman ê Konferansî ra yew zî beşdarîya Fermandarê Pêroyî yê Hêzanê Sûrîya Demokratîke (HSD) Mazlum Ebdî û Hemsereka Dayîreyê Têkilîyanê Teberî ya Rayberîya Xosere Îlham Ehmed bi.
Parlamentera DEM Partî ya Amedî Ceylan Akça ke beşdarê konferansî bîye, derheqê konferanî de ajansê ma rê qisey kerd.
Akça vat ke konferansî de Başûr, Vakur û Rojava ra temsîlkarê kurdan est bî û vat: “Her parçe awanîyanê mîyanneteweyî de rolêko xo yê bêemsal est o. Çîyo ke ma kerd dîplomasîyê seba pawitişê kurdan bi. Konferansî Konferansê Aştî yê Parîsî yê 1922î ard mi vîr. Uca de kurd û erebî seba ronayîşê dewletanê neweyan ameybî dûrvistene. Temsîlîyetê ma zelal kerd ke ma do girişêko nedemokratîk de nêrê helînayene.”
Akça derheqê dawetîkerdişê Mazlum Ebdî û Îlham Ehmedî de vat: “Ê sey heyetêko cîya ameyî dawetkerdene û rolê înan ê Rayberîya Xosere de ame naskerdene. Hêzanê mîyanneteweyî fehm kerd ke kurdî sereyê xo nêtewînenê û eke şer bêro înan ser o înan bêro ferzkerdene ê hazir ê ke şer zî bikerê.”
Akça vat ke heyetê Rojava reyde kombîyayîş kerdbi û vat: “Ebdî û Ehmed her tim waştişê kurdan ê nemerkezîbîyayîşî îfade kerd. Eke rejîmo newe biwazo lîsteya ‘dewleta sponsorê terorîzmê’ ra bivejo, ganî garantî bikero ke kurdî Sûrîya newîye de bi seypêyî bêrê temsîlkerdene.”
Akça vat ke konferansî de prosesê “Aştî û Komelê Demokratîkî” zî ameyo munaqeşakerdene û vat: “Wezîrê Sûrîye û senatorêko amerîkayîj qirkerdişê ke vera kurd, durzî û elewîyan ameyî kerdene sey ‘serebût’ û ‘şaşîyê şenikî’ pênase kerdî. No delîl o ke senî dewletî xem nêkenê. Coka dîplomasîyê şarî seba dewletan nêzdîbîyayîşêko cîya lazim o.”
Akça tewr peynî vat: “Şerê warî sey şerê masaya muzakereyî muhîm o. Nê konferansî reyna mojna ke ganî ma dîplomatanê xo perwerde bikerê ke ê bieşkê çar hetanê dinya de waştişanê kurdan bi vengêko berz bîyarê ziwan.”
