Hemserekê Pêroyî yê ÎHD’yî Cîhan Aydînî vat ke ganî heqê hêvîye seba Rayberê Şarê Kurdî Abdullah Ocalan û heme tepîşteyanê sîyasîyan bêşert û bêmercan bêro caardene. “Eke no proses çin bîyêne zî ganî no heq bêro caardene. Heqê hêvîye heqêko global o û bi qanûnê verênî zî şêno bêro caardene.”
Derheqê raporê hemparî yê Komîsyona Meclîsî de Aydînî vat ke raporî de nameyê mesele çin o û meseleya kurdan sey meseleya kurdan nêameye pênasekerdene, la raporî ser o %90 partîyanê sîyasîyan razî bîyê û coka no raporo hempar muhîm o û bingeyê çareserkerdişî yo. “Babaeta caardişê qeraranê AÎHM’î babetêka muhîme ya raporî ya. Eke nê pêşnîyazî bibê qanûn çareserî do asanêr biba.”
Aydînî derheqê heqê hêvîye de vat: “Ma çarçeweya prosesê çareserkerdişî de nirxnayîşê heqê hêvîye xelet vînenê. AÎHM’î derheqê heqê hêvîye de seba Rayberê Şarê Kurdî Abdullah Ocalan qerar dayo. Ganî bêşert bêro caardene. Seba naye hewce nîyo ke qanûnê neweyî bêrê vetene, bi qanûnê ke est ê zî şêno bêro kerdene.”
Aydînî vat ke ganî heqê perwerdeyê bi ziwanê dayike bêro temînkerdene, hemwelatîya seypêyî qanûnî de bêro garantîkerdene û warê îdareyanê herêmkîyan bêro hîrakerdene.
Derheqê mesajê Rayberê Şarê Kurdî Abdullah Ocalan yê entegrasyonê demokratîkî de Aydînî vat: “Birêz Ocalan vano ke eke dewlete demokratîk bo mesele zî do bêro çareserkerdene. Qanûnê hemwelatîya azade garantîya heqê enuversalî yê heme hemwelatiyan ê, beşdarîya komelî, beşdarîya îdareyê dewlete û şuxulnayîşê heme heqan. Entegrasyono demokratîk nê esasî ser o yo.”
Aydînî peynî de derheqê şerê Îranî de vat: “Eke Tirkîya wazena ke tîya çareserkerdişî bikero ganî Îran de zî kurdan reyde sîyasetêko dostane bido xo ver. Eke Tirkîya nê sîyasetî bikera hem Tirkîya de hem zî Îran de çareserî do aver şêro û Tirkîya do hîna xurt bibo.”
