Hemsereka Meclîsê Xoserîya Demokratîk ê Şengalî Cîhan Celo derheqê hewldananê hêrişanê peyênan de dîyar kerd ke Tirkîya û çend rayedaranê Îraqî hêrişanê vera Şengalî pêameyê û vat: “Nê rayedarî vera êzidîyanê û serê fikrê DAIŞ’î de yê. Wazenê hêriş bikerê ke amancê dewleta Tirkîya bi ca bîyarê.”
Hukmatê Îraqî no demêko tehdîdanê xo yê vera komelê kurdanê êzîdî zêde kerdê û dorûverê Şengalî zî qerargeh newe yê leşkerî virazenê. Nê cehdî sey amadekarîya hêrişêkê vera êzîdîyan yeno pênasekerdene û tesîrê Tirkîya zî nînan de est o. Sewbîna zî Îraq wazeno şarê êzîdî bêçek bikero û hêzê înan ê xopawitiş û xorayraberdişî sey suc bido mojnayene. Nê averşîyayîşê peyên ê Şengalî raya pêroyî de rastê reaksîyonan yenê û seba çareserî bi rayîrê dîyalogî vengdayîşî yenê kerdene.
Hemsereka Meclîsê Xoserîya Demokratîk a Şengalî Cîhan Celo derheqê averşîyayîşanê peyênan de ajansê ma rê qisey kerd.
‘Hêrişê vera kurdan komployê mîyandewletî reyde girêdaye yê’
Destpêkê qiseykerdişê xo de Cîhan Celo bale ante hêrişanê vera kêmnetewan û kembawerîyan ê Rojhêlatê Mîyanênî ser o û dîyar kerd ke hêrişê taybetî şarê kurdî ser o yenê kerdene. Cîhan Celo îfade kerd ke tewr peynî bi hetkarîya Tirkîya, Hukmatê Demkî yê Sûrîya hêrişê Rayberîya Xoser ya Rojavayê Kurdîstanî kerd û vat: “Amerîkayî zî rayîrê hêrişanê înan akerd. Merdim eşkeno nê hêrişan bi komployo Mîyandewletî reyde girê bido ke vera Rayber Apo ame viraştene ke amancê înan çinkerdişê îradeyê şarê kurdî bi. Waştêne fikrê demokrasî û azadî bifetisnê. La hem xoverdayîşê Rayber Apo yê zindan de hem zî xoverdayîşê şarê kurdî yê seba Rojavayê Kurdîstanî nê planî veng vetî.”
‘No proses do 2014î ra zehmetêr bo’
Cîhan Celo dîyar kerd ke Tirkîya Rojava de waştişê nêardê ca û nika zî verê xo dayo Şengal û wina vat: “Badê prosesê Rojava, wezîrê teberî yê Tirkîya şarê Şengalî tehdîd kerd û dîyar kerd ke ê do hêrişê Şengalî bikerê. Xora dewleta Tirkiya serra 2017î ra nat hêrişanê xo yê vera pêşenganê komelê ma kenê û bi teyaran û dronan nê pêşengan hedef gênê. Nika zî dewleta Tirkîya bi tay rayedaranê dewleta Îraq seba hêrişanê vera êzîdîyan pêameyê. Hema zî hukmatê Îraqî nêameyo ronayene û hukmato nikayîn hukmato tewr qels o ke nêeşkeno qerarê şerî yan zî hêrişan bido.
Tay şexsîyetî hemverê êzîdîyan ê û fikrê DAIŞ’î pawenê. Wazenê hêriş bikerê ke amancê dewleta Tirkîya bîyarê ca. Nika tehlukeyêko gird vera Şengalî est o. Tehlukeyo tewr gird ardişê DAIŞijan o. Beno ke sey wehşetê DAIŞ’î hêrişê ma nêkerê, la do no proses yê verênî ra zehmetêr bo.”
‘Wazenê heyf bigîrê’
Cîhan Celo da zanayene ke na rey wazenê bi rayîrê dewlete hêriş bikerê, îrade û destkewteyanê komelê êzîdî bikerê hedef. Cîhan Celo wina dewam kerd: “Sewbîna zî wazenê çekanê komelî kom bikerê, yew tehlukeyo tewr gird no yo. No çî rayîrê fermanan akeno. Yeno zanayene ke Dêrezor ê Sûrîya de DAIŞ reyna xo awan keno û uca ra agahîyê balkêşî yenê. Seke yeno zanayîş sînorê Dêrezor û Îraqî yew o û eşkenê hêrişê Îraqî bikerê. Xora Şengal hedefê înan de yo. Wazênê heyfê 2014 û 2015î bigîrê ke Şengal de şikîyabi. Eynê çî wazenê Kobanî de zî bikerê. Aye ra hema zî dorpêç serê Kobanî ra nêwerişto. Çi bi hewayê fizikî, çi bi hewayo bîn wazenê hêrişê Şengalî zî bikerê.”
‘Ganî kurdî Şengalî rê wayîr vejîyê’
Cîhan Celo qalê dayîşûgirewtişanê hukmatê Îraqî reyde zî kerd û derheqê babete de nê çîyî vatî: “Ma wazenê hêzê çekdarî û asayîşî ke badê 2014î ameyê ronayene, entegreyê dewlete bêrê kerdene û biresê resmîyet. Dîyalogê ma dewam kenê la heta nika tu netîce nêameyo girewtene. Heta destê ma ra bêro ma nêverdenê şer vejîyo, la eke şer vejîyo zî ma zî mirdîya xo est ê. Ma senî vera DAIŞ’î vindertî, nika zî o îrade û bawerîya ma est a ke vera heme tewir hêrişî xover bidê. Ganî welatanê ke jenosîdê êzîdîyan qebul kerdo, vera hêrişanê neweyan zî vengê xo berz bikerê. Sewbîna zî kurdê 4 hetê Kurdîstanî û Ewropa senî wayîrê Rojava vejîyayê ganî wina wayîrê Şengalî zî vejîyê. Ma veng danê şarê ma yê êzîdî zî ke dorê hêzanê xo yê leşkerî de bibê xelek û meverdê îradeyê komelê êzîdîyan bêro çinkerdene.”
