Komeleya Cinîyan a Rosa, reaksîyon vera padayîşê produksiyonê Kompanya Gizîngê Berbeyan mojna. Nameyê Komeleya Cinîyan a Rosa ser o Berfîn Polat qisey kerd û vat: “Ma vengê selahîyetdaran danê ke lezkî nê qerarê xo ra fek vera bidê.”
Bajarê Silêmanî yê Kurdistanê Başûrî de hêzê asayîşî eştî şîrketa produksiyonê Kompanya Gizîngê Berbeyan ser o û padayî. Komeleya Cinîyan a Rosa reaksîyon vera babete mojna. Endama Komeleya Cinîyan a Rosa, JINNEWSî rê qisey kerd.
‘Cinî bîyî hedefê îqtîdarî’
Berfîn Polat dîyar kerd ke îqtîdar bîyayîşê cinîyan ê her wareyî de terseno û vat: “Pergalo ke serdestîyê camêrdan ser o ameyî awankerdiş, seranserê tarîxî de polîtîkaya şerê taybetî semedê pawitişê heqê xo ca ardo. Serkêşîya cinîyan ê sîyaset, aştî û demokrasî de her tim îqtîdarî tersnayo û nê semedî ra zî cinî bîyê hedef.”
‘Ma hetê Kompanya Gizîngê Berbeyanî yê’
Berfîn Polat wina peynî kerd: “Îqtîdarî destkewtişê cinîyan ra tersenê. Nê semedî ra cinîyan hedef gênê. Ma hetê şîrketê produksiyonê Kompanya Gizîngê Berbeyanî yê. Ganî selahîyetdarî lezkî fek nê qerarê xo ra vera bidê. Her cayê Kurdistanî de cinî hemverê rejîmê netewperest-dînperest û cinsperest xo ver danê. Cinî semedê komelêka azade têkoşînêko gird danê. Têkoşînê cinîyan îlham dano cinîyanê dinya. Ma hetê şîrketî yê û veng danê ke selahîyetdarî lezkî fek nê qerarê xo ra vera bidê.”
