Cinîyan seba rayîrşîyayîşêko ke do siba Parkê Aştî yê Nisêbînî ra heta sînorê Qamişloyî bêro kerdene vengda her kesê ke tewrê rayîrşîyayîşê bibê û vat “Bê Rojawanî cuye nêbena.”
Rijîyayîşê Rejîmê BAASî’ ra dima “Sûrîyeya Newîye” yena qalkerdene, Tirkîya û Artêşa Neteweyî ya Sûrîye (SMO) hêrîşanê xo yê Vakur û Rojhelatê Sûrîye ser o kerdî zêde. Hêrîşê Bendawa Tişrîn û Pirda Qereqozaqî dewam kenê, yeno vatene ke hedefo bingeyîn Kobanê yo. Nobeta ke 13ê Kanûnî ra ver sinorê Qamişloyî yê qezaya Nisêbîn a Mêrdînî de vera hêrîşanê Rojawanî dest pêkerdê, kewte roja xo ya 20. Siba zî do vera hêrîşan bi sloganê “Ma şarê Rojawanî ke seba aştî, azadî û têreydevîyardişî xover danê silam kenê” Parkê Aştî yê Nisêbînî ra heta sînorê Qamişloyî rayîrşîyayîşêk bibo.
Çalakgerê nobeta sinorî, seba rayîrşîyayîşo ke do siba bêro kerdene Ajansa JINNEWS’î rê qisey kerd û veng da ke heme şarî ke tewrê ci bibê.
‘Ma do seba ke hêrişê verba Rojawanî biqedîyê rayîr bikewê’
Qiseykerdoxa Komîteya Herêmî ya Rêxistina Wilayetê Mêrdînî ya Partîya Têdûştî û Demokrasî ya Şaran (DEM Partî) Nahîde Yalçin dîyar kerd ke nobet bi samîmîyetêko pîle dewam keno û qeyd kerd ke ê do xebatanê xo ra netîce bigêrê. Nahîde Yalçina ke veng da her kesê ke tewrê rayîrşîyayîşêko ke do siba bêro kerdene bibê û wina qisey kerd: “Ma do hem seba ke tecrîd biqedîyo hem zî seba ke hêrîşê Rojawanî biqedîyê rayîr bikewê. Ma wazenê ke şer biqedîyo û pêvînayîş bibo wesîleya aştî. Ma paweyê heme şarê xo yê ke tewrê rayîrşîyayîşî bibê.”
‘Ma dest bidê pê û nê şerî biqedînê’
Hemsereka Komela Ardimî û Piştgirîya Keyeyanê Girewtî û Mehkûman (TUHAY-DER) a Mêrdînî Zînnet Alganî va: “Ez Şorişa Rojawanî silav kena û serkewtiş wazena hemîne rê ke uca de xover danê. 19 rojî yo ke ma bi veng û tilîlîyanê xo çalakîya xo ya sinor de yê. Heta ke no şer dewam bikero ma do zî çalakîya ma ya sinorî zî do dewam bikera. Verê şarê Nisêbînî de wa heme şarê ma destê xo bido wijdanê xo û wa paştî bido rayîrşîyayîşê ke ma do siba bikerê. Mabênê ma û Rojawanî de tena dêsêk est o. Wa kes nêvajo ‘çîyêk nêbeno mi ‘. Ma dest bidê pê û nê şerî biqedînê.”
‘Êdî wa ne mayî nêbermê’
Maya Aştî Sureyya Yilmaz zî ard ziwan ke ê seba Rojawanî sînor de roniştê û va: “Wa na gonî biqedîya. Wa ne maya gerîla biberma ne zî maya eskerî. Ma çira tîya de yê? Tîya erdê ma yo, tîya welatê ma yo. Ê ma ra se wazenê? Tîya erdê may û pîyanê ma yo, êdî destanê xo ma ser ra biancê. Êdî bes o. Kênayê ma, lacê ma şehîd kewtî. Heta ça şono? Ma êdî rincan bîyê, êdî bes o.”
‘Rayberê ma ra girewtişê xebere zaf baş bi’
Sureyya Yilmaza ke pêvînayîşê ke Rayberê PKK’yî Abdullah Ocalanî reyde virazîya ard vîrî va: “Rayberê ma reyde pêvînayîşêk bi. Ma zaf keyfweş bîyê. Girewtişê xebere zaf weş bi. Ma hêvî kenê ke do ey reyde bikewê dîyalog û prosesêk dest pêbikero. Ma veng danê heme kesî ke seba aştî vera şerî siba bêrê rayîrşîyayîşî.”
‘Ma merg û gonî nê, ma azadî wazenê’
Qiseykerdoxa Mayanê Aştî yê Qoserî Tenzîle Agatayî ard ziwan ke ê seba azadîya Rojawanî sînor de yê. Tenzîle Agatay qeyd kerd ke ganî her kes paştî bido Rojawanî, wina qisey kerd: “Ma hêvî kenê ke serra 2025î biba serra azadî, aştî, rehetî û serkewtişî. Ma seba ke bibê vengê Rojawanî tîya de yê û heta ke Rojawan azad nêbo ma do tîya ra nêwerzê. Ma veng danê her kesê ke tewrê rayîrşîyayîşê sibayî bibê. Seyda Perînçek deyîra xo de vano ‘Yew ma ra şî yew şima ra şî, ma her di ra di kesî şî.’ Wa ne ma ra şêro ne zî şima ra şêro. Ma merg û gonî nê, ma azadî wazenê.”
‘Bê Rojawanî cuye nêbena’
Muhlîse Uçuk zî wina vat: “Cuye bê Rojawanî nêbena. Wa Cîhan û Nazim nêmirê. Êdî bes o. 19 rojî yo ke ma tîya de yê û ma do heta peynî zî tîya de bibê.”
