Endamê cinî yê Şaredarîya Wareyê Koçberan yê Mexmûrî bi munasebeta roja 8ê Adare Roja Cinîyan a Dinya dar û nêrgize ronayê.
Bi munasebeta 8ê Adare Roja Cinîyan a Dinya endamê cinî yê Şaredarîya Wareyê Koçberan yê Şehîd Rustem Cudî (Mexmûr) dar û nêrgize ronayê. No serê sibayî endamê cinî yê Şaredarîya Mexmûrî parka 4ê Nîsanî yê Abdullah Ocalanî seba cewabdayîşê dîyarîya Rayberê Şarê Kurd Abdullah Ocalanî ya seba cinîyan, dar û nêrgize ronayê. Hemsereka Şaredarîya Mexmûrî Fatma Bîlen derheqê çalakî de qisey kerd.
Fatma Bîlen destpêkê qiseykerdişê xo de Roja Cinîyan a Dinya seba Abdullah Ocalanî, cinîyanê Kurd û heme cinîyanê xoverdayoxan pîroz kerd û vat: “Ma seba cewabdayîşê dîyarîya Rayberî ke seba ma cinîyan erşawita, dar û nêgize ronayê. Roja 8ê Adare roja newe ra bîyayîş û newekerdişê cinîyan a. Na roje hemverê sîstemê îqtîdar o ke cinî înkar keno, seba ey o, estbîyayîşê xo rê wayîr vejîyayîş o. Ma do bi mesaj û vengdayîşê Rayber Apoyî binê sloganê ‘Jin jîyan azadî’ de pêşwazîya azadîya fîzîkî ya Rayber Apo bikerê.”
Bi sloganê ‘Bijî Serok Apo’ û ‘Jin jîyan azadî’ cinîyan çalakîya xo qedênaye.
