Înîsîyatîfê Mi rê Aştî Lazim a ya Cinîyan vera hêrişanê Rojava ser o verê xo da qezaya Pirsûsî. Cinîyan venga rayedaranê Tirkîya da ke wa piştî nêdê HTŞ’î û seba ke hetkarîye biresa Rojava berê sînorê Kobanî bêro akerdene.
Înîsîyatîfê Mi rê Aştî Lazim a ya Cinîyan vera hêrişanê qirkerdişî yê Rojava ser o wirzê û paştî bidê xoverdayîşê Rojava, şaristananê Tirkîya ra ameyê Pirsûsî, waşt ke berê sînorê Murşîtpinarî yê Kobanî bêro akerdene. Înîsîyatîf ewro resa Pirsûs û Qadê Pirsûsî eşekrayî daye.
Cinîyî bêmabên sloganê, “Bijî berxwedana Rojava”, “Piştgirîya jinan sînoran derbas dike”, “Jin şer naxwazin aştiyê dixwazin”, “Jin jiyan azadî”, “Şehîd namirin” û “Rojava Rojhilat e Kurdistan yek welat e” vatê.
Hemsereka DEM Partî ya Rihayî Ayşe Surucu destpêkî de qisey kerd û sipasîya cinîyan kerd ke şaristananê Tirkîya ra ameyê û vat: “Şarê kurd û dostê kurdan vera hêrişan lingan ser o yê. Heta hêrişî vinderê xoverdayîşê ma yê vera hêrişan do dewam bikero.”
‘Ganî berê sînorî bêro akerdene’
Badê metnê eşkerayîya 216 rêxistinanê cinîyan û sosyalîstan ke piştî danê Rojava ame wendene. Metnê Komela Pawitişê Cinîyan ra Hîvda Yucekaya wend û nê vatê:
“*Hêrişê vera şarê kurdî û şaranê bînan ê Sûrîye ganî bilez bêrê vindarnayîş!
*Dorpêçê şaristanê Kobanî ser o ganî bêro wedaritene, kewtişê malzemeyanê lazimtîyanê heyatî ganî bêro garantîkerdene. Dewleta Tirkîya eşkena nê bi akerdişê korîdorêkî bîyara ca.
*Heqê kurdan û şaranê bînan ê Sûrîye ganî bêrê şinasnayene û hêrişî bêrê vindarnayene.
*Sucê şer ê vera şarî ganî biqedîyê.
‘Uca de şer tîya de aştî nêbena’
Aktîvîsta TJA’yî Sebahat Tuncel vat ke heta hêrişê Rojava ser o dewam bikerê, Tirkîya de aştî nêbena û vat: “Ma vanê uca de şer, tîya de aştî nêbena. Tena kurdî vîndî nêkenê, heme şarî vîndî kenê. Ma sey TJA wazenê berê sînorî bêro akerdene û Sûrîye de zî aştî biba. Eynî wextî de ma wazenê Tirkîya agêra masaya muzakere ser o û problemî bi dîyalogî bêrê çareserkerdene.”
‘Ma vengdayîşê hetkarîya Rojava kenê’
Hemşaredara Amedî ya Şaristanê Girdî Serra Bucak zî dîyar kerd ke cinîyî vera hêrişan mîyanê piştîdayîşî de yê û vat: “No şer bi zîhnîyetî camêrdî yeno kerdene û tewr zaf cinî û gedeyî rastê qirkerdişî yenê. Eke berê sînorî bêrê akerdene ma eşkenê hetkarî berê Rojava. La seba ke berê sînorî girewte yo, ma nêeşkenê hetkarîya Rojava bikerê. Platformê Pawitişê Şaristanî yê Amedî seba hetkarî kampanya daye destpêkerdene.”
Badê eşkerayîye cinîyî vera hêrişanê Rojava û astengkerdişê polîsan çalakîya ronîiştişî daye destpêkerdene. Badê çalakî cinîyî bi rayîrşîyayîş û sloganan vîyartî awanîya DEM Partî ya qezaya Pirsûsî.
