Demserre payîz a, aşma êlule ya. Hewayê germî hêdî hêdî cayê xo hewayê serdî rê veradano. Wexto ke şima Kurdîstan de biciwîyê, şima zanenê ke zimistan nezî beno û heme merdimî êdî amadekarîya zimistanî kenê. Amed de cinîyan bi hawayêkê komî dest bi amadekarîya zimistanî kerd.
Her serre pêro sûk, qeza û dewanê Kurdîstanî de semedê vîyarnayîşê zimistanêkê aram, xebatî yenê kerdene. Nê xebatan rê cinîyî rayberîye kenê û xebatî bi hawayêkê komunalî yenê rayîrberdene.
Amed de cinîyan paştî daye yewbînan û bi komî dest bi viraştişê konserveyan kerd. Her karî de zor û zehmetîyê xo est ê. La viraştişê konserveyan zaf zehmet o.
Cinîyanê ke saetanê serê siba de şîyî Hal, yanî cayê rotişê sebze û mêyweyan o top, dikan bi dikan geyrayî û cawo tewr ercan de sebzeyê xo erînayî. Goreyê serranê vîyarteyan fîyatê sebzeyan zaf bîyo berz. Goreyê erînayîşê topî zî; kîloya firingîyan 15, îsotan 25, îsotanê gozinan 40 û balîcananê sîyayan 22 lîra ra girewt.
2 cinîyan sebzeyê xo bar kerdî wesayîtî ser û ardî cayê viraştişî. Tîya de hûmara embazanê ke do bi komî hetkarîya yewbînan bikerê 1 camêrd 4 cinîyî, pêro pîya bîyî 5 kesî.
Ehmed Tamîrî bi lez quşxane na adirî ser û dest bi vekerdişê adirî kerd. Cinîyan zî legan, kardî û qavanozê xo nayî xo ver û dest bi çinayîş û hûrkerdişê firingîyan, balîcananê sîyayan û îsotan kerd.
Dima ke sebzeyî kelîyayî, qavanozî ameyî pirkerdene û semedê werdişê rojanê zimistanî ameyî wedaritene.
