Cinîyê Dêrsimî nê 8ê Adare de seba aştî û azadîye keyeyanê xo ra vejîyayî û rayan, meydanan, kûçeyan de dima zî ameyî mîtîngê Dêrsimî de vengê xo berz kerd va: “Ma bîme, estîme, her ca de linganê xo ser derîme, waxt waxte Cinîyano.”
Dêrsim de cinîyê ke bi reng û vengê xo seba 8ê Adare vejîyayî sukan û rasteyan waştenê xo rêy zî mîkrofonê ajansê ma de kerd berz.
‘Kîştena cinîyan mebo’
Makbûle Kirbag: “Ewro roja ma ama, xêr ama, rindîye ser aştîye ser ama. Kîştena cinîkan mebo. Ma vera kîştene vîndenîme.”
‘Teyna nîyîme’
Beser Aşkin: “Ma wazenîme rindîye û delalîye bêro. Rind bêro rind şêro. Tengîye nêvazeme. Ma cinîkî teyna nîyîme.”
‘Tengîye nêwazenîme’
Makbûle Emîre venga qomê xo dana û wina vana: “Ewro roja ma wa. Roja xêre re amey me. Perûne pîya way û biray bê. Jê verî jûmînî bîjêrê. Destê jûmînî bîjêrê. Hîn bikerê ke, koyê Dêrsimî kes mejêro, Hukmat mejêro. Zonê xo qisey bikerê. Cinîkîrê Vilike bîdêrê.”
‘Cinîkîre Vilike bîdere’
Îmîş Dalgiç: “Cinîkû çira kîşenê. Çira xever danê. Cinîkî ke nêbê weşîye çîna. Cinîkî kî nêbî, rindîyê nêasena. Cinîkî ke çinîbê, her çî verevere laşer de sono.”
‘Rindîye bêro’
Hanim Gokmen: “Her roj cinî mîrenê. Vame ke nayera tepîya kesîrê towa mebo. Rindîye bêro.”
‘Xiravinîye nêwazenîme’
Makbule Gûrey: “Rindîye bêro, kesîrê towa mebo. Kiştena cinîkûn rind nîya, xirabo. Heq est o, na çi xiravinîya ameya ma ser.”
‘Weşîya cinîkûn wazenîme’
Xatûn Çinar: “Seveta poşt dayene ma cinîkî ameyme têhet. Cinîkî aştîye vazenê, weşîye vazenê. Kam vazeno ke cinîkî bimîre?”
‘Cinîkî azad bê’
Şûkrîya Oksal: “Cinîkî azad bê, kes cinîkû rê towa mekero. Aştîye bêro. Ma Kurmancîme.”
‘Ma ceng nêwazenîme’
Şûkran Tepe: “Aştîye bêro, ceng nêwazenîme. Rindîye û delalîye bêro.”
‘Roje ewroyêne zaf rindeka’
Elîf Akbayir: “Kes kesî rê towa mekero. Roja ewroyêne zaf rindeka, roja ma wa.”
‘Her çî rindîye ser bêro’
Gûlîstan Erdogan: “Rindîye bêro, kes cinîkû ra qiseyan mevazo. Ceng nêvazeme, her çî rindîye ser bêro, rindîye ser şêro.”
