Sîyasetmedar û çalakîkerî cinî yê Sûrîye dîyar kerd ke projeya cuya hembeş û Rayberîya Xosere a Vakûr û Rojhelatê Sûrîye seba caardişê edelet û seyyewbînî modelêka serkewte ya.
Cinîyê Kantonê Tebqayî ajansê ANHA’yî rê behsê îmtîhanê xo yê binê sîwana Rayberîya Xosere de û behsê xebatanê xo yê seba bidestvistişê heqanê xo yê Sûrîyeya ameyoxî kerd.
Hemsereka Meclîsê Tebqayî ya Partîya Sûrîya Ameyoxe Barîn Maam dîyar kerd ke îqtîdarê Şamî hema zî polîtîkayanê rejîmê verêne domneno û tena tayê rolanî şenikan dano cinîyan. Reyna dîyar kerd ke dûrvistişê şar û cinîyanê Vakûr û Rojhelatê Sûrîye prosesê sîyasî ra tewrê deskewteyanê ke herême de qezenç kerdê dewamê nêzdîbîyayîşê camêrdan yê otorîter o ke hewl dano rolê cinîyan şenik biko û înan merkezanê qerardayîşî ra dûr bifîno.
Seba cinîyan modelêka pêşeng
Barîn Maam dîyar kerd ke cinîyan binê sîwana Rayberîya Xosere de zaf çîyê bidestvistê. Sey beşdarîya rasteqîn ya heme sazîyan de se ra 50, reyna qadanê sîyasî de pêşengîya înan, leşkerî, aborî û awankarîye. Barîn dîyar kerd ke bi saya nê deskewteyan hêzê cinîyan eşkeno tewrê awankerdişê Sûrîya newa bibo. Reyna no hêz vernîya cinîyan akeno ke bieşkê tewrê îmtîhanê pêşeng bibê.
Raybera Kombîyayîşê Cinîyan yê Zenûbya Kewser El Ehmed vat ke cinîyê Sûrîye bi desan serran ameyê peygoşkerdene û dîyar kerd ke rewşa nikayîne tarixî û muhîm a. Ganî cinîyê Sûrîye seba bidestvistişî azadîye, edelet û seyyewbînî xo bişanê îmtîhanê Rayberîya Xosere.
Bi tewrbîyayîşê çalak yê cinîyan ver bi Sûrîya demokratîke
Hemverfeka Meclîsê Cinîyan ya Partîya Sûrîya Ameyoxe ya Tebqayî Muna El Dalî dîyar kerd ke tewrbîyayîşê cinîyan yê Rayberîya Xosere û xoresnayîşê qadanê qerardayîşî asan nêbi. Ê rastî xeylê astengîyan ameyê. Muna dîyar kerd ke dewrkerdişê nê îmtîhanî seba heme cinîyanê Sûrîye tekane garantîyê heqanê cinîyanê Sûrîye yo.
Endama Kombîyayîşê Cinîyan ya Zenûbya Xuzama El Elî ard ziwan ke yewkerdişê xebatanê cinîyanê Sûrîye na rewşa tarixî û zaf muhîm a û da zanayene ke modela cinîyan ya herêmanê Vakûr û Rojhelatê Sûrîye seba heme cinîyan berbanganê newe yê xoverdayîşî akeno.
