Ewro serrgêra vîndîbîyayîşê 6. ya wendekara Unîversîteya Munzurî Gulîstan Doku ya. Heta na roje derheqê aqubetê aye de çîyê nêvecîya orte. Zereyê şarê Dêrsimî seba ke Gulîstane Dêrsim de bîya vîndî verêna dejena. Cinîyê Dêrsimiji tayêna zaf kunê xo ver û vanê: “Ma çêneka xo wazenîme.”
Wexto ke 6 serrî naye ra ver Gulîstan Doku Unîversîteya Munzurî de wendekar bîye, şewê bîye vîndî. A roje ra heta na roje ci ra xeberê nêameye girewtene û bedenê aye zî nêame vînayene.
Nê welatî de wexto ke cinî bi destê camêdan şîdet vînenê, yenê kiştene, benê vîndî, dewlete û sazgehê dewlete benê kor. Tena kor nêbenê zafêrî zî serê meseleyan bi hetkarîya camêdan yena girewtene.
Ma seba Gulîstan Doku Dêrsim de Nîmet Koç û Jînhar Taçyildîz reyde qisey kerd. Ma dî ke seba ke Gulîstan cayêde zê Dêrsimî de bîya vîndî û nêameya vînayene, heto bîn ra zî nêameya pawitene, ê xo sucdar kenê.
‘Gulîstan jê çêneka ma bîye’
Nîmet Qoç, qiseykerdena xo de Gulîstane zê kêneka xo vînena, seba aye wina vana: “Seveta Gulîstan Doku, zereyê ma zaf şîkîya. Ma welatê xo de çîyo nîyanên caran nêdîyo. Zaf qîmet danîme çênekanê xo. Cayê bînî handayê Dêrsimî qîmet nêdanê çênanê xo. Ma çênekanê xo danîme wendene, lajan ra jêde çênekan ra hes kenîme. Gûlîstane jê çêneka ma bîye. Na çêneke çira bîye vînd, kamî se kerd, kotî de kerde vîndî, bi zanime? Seveta Welate xo, seveta Gulîstan Doku, zaf zereyê ma şikîya. Îyê ke tewer de yenê, handê de laj û çênekanê xo qîmet danîme cî. Xeberûn de namê Gulîstane ke heşîyo pê, cîgerê mi vêsenê. Dewlete çira çêneke nêvînena. Naye ra ver, Dêrsim de çîyo henên çîn bî, nika welatê ma kî bî yo xiravin. Dewlete karê xo rind nêkena.”
‘Vazeme ke, çêneka ma vejê ma rê bîyarê’
Jînhar Taçyildize zî Gulîstane zê kênaya xo zana, vana, ‘çêneka ma vejê ma rê bîyarê,’ û wina domnena: “Ma vêrnîya naye bijerîme ke domanê ma, tornê ma rind bîfetelîyê. Ma heroj rawaşteyena xo de, qiseyê heşîme pê. ‘Jû çêneke kardî kerde, kişte,’ nêzon sekerde. Heq marê rayê de rinde yakero. Domananê ma rê, cencan rê rindîye bîyaro. Çîyê qefçilîye welatê xo de nêvazenîme. Seba Gulîstan Dokuye zereyê ma zaf şikîya, zaf deja. Seveta aye qomê ma ame pêser, vengê xo kerd jû, vûncîya kî towa nêvejîya. Vazeme ke, çêneka ma vejê ma rê bîyarê.”
