Dêrsim de mîtîngê 8ê Adare de Wekîla DEM Partîye Ayten Kordu va ke ê sey cinîyan vengdayîşê tarîxî yê Abdullah Ocalanî ra hetkarî danî û wina va: “Ma do komelo demokratîk înşa bikerê.”
Dêrsim de bi pêşengîya cinîyan Kuçeya Sanatî de mîtîngê 8ê Adare ame viraştiş. Cinîyan Warê Seyîd Rizayî ra hetanî warê mîtîngî meşîyayê.
Cinîyê cil û bergê kurdewar xo ser kerdê û bê mîyan “jin, jiyan, azadî” qîrayê.
Bi nameyê Platformê Cinî yê Dêrsimî Serpîl Argan metnêk wend û metîn de ame vatiş ke ê seba mîrasê ke demê vîyarteyî ra girewtê do biresnê rojê ameyoxî rê, no ser waran de yê û wina ame vatiş: “Bi destê qeyûman, îradeya çin hesibnenê. Ma sey cinîyê, qeyûman qebul nêkenê. Nika ra Sûrîye de elewîyê yenê qetilkerdiş. Ganî cîhatperestan ra hetkarî nîro dayîş. Embazê cinîye hema zî hepisxaneyan de yê, ma do hetanî peynî têkoşînê xo bidomnê.”
Ma aştî wazenê
Hemsereka Şaredarîya Dêrsimî Bîrsen Orhane ke cayê a qeyûm ame tayînkerdiş, dîyar kerd ke ê hepis bikê zî, ê qet nêtersenê û wina domna: “Aştî de çew, çewî ra zilim nêkeno. Ma sey cinîyê rolê ma zî înşakerdişê aştîye de est o. Ma aştî wazenê.”
Wekîla Dêrsimî Ayten Kordu zî Sakîne Cansiz, Aysel Dogan ard vîr û aşkera kerd ke no pergal, xususî cinîyan û heme dormerayan ra zilm keno û wina va: “Ma sey elewî, kurd ameyê têhet û ma rêxistinîya xo awan kerd. Dewlet rêxistinbîyayîşê ma ra tersena, ma ganî rêxistinîya xo qewetir bikerê. Sey vatişê Birêz Ocalanî do na cografya de aştî bi destê cinîyan biba. Bi serrana ke no welat de elewî û kurd sey terorîst yenê namekerdiş. Ma dewlete ra vanê ke rolê xo kay bikere. Ma sey kizilbaş do her tim verba zilmî de bivinderê. Sûrîye de qirkerdişêkî yenê kerdiş ma şermezar kenê.”
