Cinîyê ke seba azadîya Rayberê Şarê Kurdî Abdullah Ocalanî ya fîzîkîye Amed ra ver bi Ankara şinê, Guvenpark de beyanat da. Cinîyan vat: “Azadîya Abdullah Ocalanî azadîya şarî, azadîya ma cinîyan a.”
Hetê Têgêrayîşê Cinîyan ê Azadan (TJA) ra bi şîarê “Bi hêvîye şîyenê azadîye” 1ê teşrîna verêne de Amed ra rayîrşîyayîş dest pêkerd û roja 7. de Ankara de dewam keno. Hewt cayan ra cinîyê ke resayê Ankara, serê sibayî Guvenpark de kom bîyî. Cinîyanê ke waşt şêrê Meclîs, hetê polîsan ra ameyî astengkerdene.
Cinîyan Guvenpark de beyanat da û sloganî eştî: “Azadî, Azadî, Azadîya rayberî,” “Heqê hêvîye heqê şaran o,” “Bijî Serok Apo.” Vernî Narin Gezgor qisey kerd û vat: “Heta ke Rayber Abdullah Ocalan azad bo ma do rayîrşîyayîşî dewam bikerê.”
Mesajê Rayber Apoyî ame wendene
Dima mesajo ke Rayberê Şarê Kurdî Abdullah Ocalanî cinîyan rê şawito, ame wendene. Çalakgera TJA’yî Sabahat Tuncele vat: “Ma waştişê edaletî yê şarê kurdî xo bar kerd. Ma waştişê haştîye pêşkêş kenê. Seba ney ma ameyî Ankara.
Rayberê Şarê Kurdî Abdullah Ocalanî vat ‘azadîya komelî azadîya min a.’ 27 serrî yo binê tecrîdî de yo labelê azadîya şarî yena vernîya yê ey. Ma vanê azadîya Rayber Ocalanî azadîya şarî, azadîya ma cinîyan a.
Ma reyna hetê Kobane de yê. Embazê ma zîndan de yê, ma azadîya înan wazenê. Çareserîya meseleya kurdan pêro Rojhelatê Mîyanênî têkildar kena. Ma venga dewlete danê ke hetê haştîye de bo.”
Sebahat Tuncele vat “Rayîrşîyayîşê ma yê ‘ma bi hêvîye ver bi azadîye şinê’ do dewam bikero.”
