Cinîyê ke bi Înîsîyatîfê Mi Rê Aştî Lazim a yê Cinîyan şaristananê Tirkîya û Vakurê Kurdîstanî ra verê xo da qezaya Pirsûsî, dîyar kerd ke hêrişî vera paradîgmaya Serekê Şarê Kurdî Abdullah Ocalanî yê û heta hêrişî bêrê vindarnayîş do têkoşînê xo bidomnê.
Grûbê çeteyê hêrişanê vera Rojavayê Kurdîstanî domnenê. Rixmê adirbestî zî vera deskewteyanê Rojava hêrişî yenê kerdene. Destpêkerdişê hêrişan ser o Rayberîya Xoser a Rojava seferberîya neteweyî îlan kerd û her hetî dinya de kurdî wariştê lingan ser o û dest bi çalakîyan kerd. Tena kurdî nê xeylê welatan de dostanê kurdan paştî daye xoverdayîşê Rojava. Endamê Înîsîyatîfê Mi Rê Aştî Lazim a yê Cinîyan ke şaristananê Tirkîya û Vakurê Kurdîstanî ra seba piştgirîya Rojava û Kobanî ameyê Pirsûs ajansê ma rê qisey kerd.
‘Ma ameyî ke vajê; têkoşînê cinîyan sînoran wedarneno’
Îdarekaranê Komela Wextê Cinîyan Newroz Onverdî ke Stenbol ra ameybî Pirsûs vat: “Ma zîhnîyetê HTŞ’yî zanê. HTŞ zî zîhnîyetê DAÎŞî yo. Ma ameyî ke vajê; têkoşînê cinîyan sînoran wedarneno. 11 serrî ra ver zî DAÎŞ’î hêrişê Rojava kerdbi. Aya rey zî înîsîyatîfê ma ameni tîya û konan de nobete girewtbî. Seba heme cinî, newe û bawerîyê cîya-cîya ke çarçeweya sîstemêko azad û seypê de biciwîyê, ma Rojava reyde mîyanê piştîdayîşî de yê. No zîhnîyet zîhnîyetê camêrdîye yo. Heta hêrişê vera Rojava biqedîyê ma do têkoşînê xo bidomnê. Waştişê ma o yo ke vera dorpêçê Kobanî berê sînorê Murşîtpinarî bêro akerdene û hetkarîye biresa welatîjanê Kobanî.”
‘Hedê kesî nîyo ke kurdan biqedîno’
Dayîka bi nameyê Halîme Kazicî zî reaksîyonê xo vera hêrişan mojna û nê vengdayîşî şarî rê kerd: “Ma vera şerî yê. Ma aştî wazenê. Hêrişê vera Rojava wa biqedîyê. Domanî serdî ra mirenê. Werd û awe çin ê. Ma nêqedîyenê. Hedê kesî nîyo ke kurdan biqedîno. Colanî vano ez do kurdan biqedîna la hedê ey nîyo. Ma do tim bibê û payan ser o bê. Vengdayîşê mi şarê kurdî rê o yo ke wirzê payan ser. Wa kes nêterso. Wa ma bikişê do se bibo. Wa ma yew rey bimirê des reyî nê.”
‘Paradîgmaya birêz Abdullah Ocalanî hedef genê’
Avûkat Gulşen Demîr zî ke Amed ra ameya Pirsûs, dîyar kerd ke hêrişê vera Rojava eynî wextî de vera sîstemê Netewa Demokratîke yê Rayberê Şarê Kurdî Abdullah Ocalanî yê û wina vat: “Serra 2014î ra nat Rojava de paradîgmaya Rayberê Şarê Kurdî Abdullah Ocalanî ser o sîstemêk awan bîyo. Nika hêrişê vera Rojava eynî wextî de vera paradîgmaya Rayberê Şarê Kurdî Abdullah Ocalanî yê. Tîya de azadîya cinîyan, newe û bawerîyê cîya-cîyayî esas yena girewtene. Eynî wextî de vera modernîteya kapîtalîst zî têkoşînêk est o.”
Nîlgun Oktay zî ke vera hêrişan Stenbol ra ameya Pirsûs, dîyar kerd ke waştişê înan o yo ke şer vindero û vat: “Seba ke şer vindero ma ameyê tîya. Ma wazenê ke no şer êdî biqedîyo û dayîkî êdî nebermê. Ma wazenê ke yewbîyayîşê şarê kurdî zî bêro ca û ganî ma tim peyê Rojava de bibê.”
