25ê Teşrîna Peyêne ke nêzdî bena, her ke şono qirkerdişê cinîyan zêdîyenî, polîtîkayê bêcezakerdişî yê dewlete, cinîyan kenê hedef. Tena aşma Teşrîna Verêne de 29 cinîyî hetê camêrdan ra ameyê qetilkerdiş, 15 cinîyî zî bi şik û guman dînyaya xo bedilnaye. Vera zêdîyayîşê qirkerdişê cinîyan û zîhnîyetê camêrdan de cînîyan çarçeweya 25ê Teşrîna Peyêne de tewir bi tewir xebatan organîze kenê. Koçberî zî çi heyf ke her hetî ra zilm dîyenî û mexdûr benê.
Muhîmîya Roja 25ê Teşrîna Peyêne û rewşa koçberan ser o Hemsereka GOÇ-DER’î Medya Alkan ajansê ma rê qisey kerd.
‘Cinîyê koçberî derbeyêka gird wenî’
Hemsereka GOÇ-DER’î Medya Alkan va ke 25ê Teşrîna Peyêne seba cinîyan rojêka zaf muhîm a, semedê çi muhîm o? Çîke vera zextê sîstem û camerdan cinî yenê têhet û wina va: “Çi heyf ke cinî koçberî de zî derbeyêka gird wenî. Cinî her ca teda vînena, nika Rojawan de pergalêk awan biya û ûca de cinîyê kurdî zaf teda û zilm nêdîyê, çimkî ewta kurd estbi û kurdî zanayne. Cinîyê erebî zilm dîyê çimkî Tirkîya de erebî nîno zaneyene. Cinîyê erebî nêeşkenî tûtê xo biberî nêweşxaneyî. Wexto ke ziwan nêzanenî, rayîr de zî merdim vinî beno. Cinîyê ereb Kurdistan zehmetî dîy, şaristanê Tirkîyaye de hem cinîyê kurd hem erebî zilm dîy.”
‘Seke tût tena aîdê cinî yê’
Hemsereka GOÇ-DER Medya eşkera kerd ke feodalîyîye de camerd, camerdî ra terseno, no ser cinî ra zilm nêkeno la belê demo ke koçberî virazîya, feodalî çin bena û wina domna: “No dem camerd teda xo de heq vînenî û cinîyan kenê. Demo ke nanê şima çinêbi, merdim nêeşkeno pay ser zî bivindero. Seba ke ziwan nêzanenî, nêeşkenî karêk zî xo rê bivînî. Xo ra koçberan ra karêk nîno dayene, cinîyê zewecnaye hîna zaf zehmetî dîyenî, çîke cuyeya feodalîyîye de sekî tût tena aîdê cinî yo. No ser zî cinî hem seba xo hem zî seba tûtî zehmetî vînenî.”
‘Ziwan her çik o’
Medya Alkan wina qiseyê xo domna: “Ziwan nêbo ma nêeşkenî çikêk bikerî, demo ke merdim cayêko ame dinya, şîro o ca kêfweş beno û demo vîyarte yad keno û çi weş bi. No ser zî seba koçberan cuye hîna zehmet o. Dewlete înan sey pere vîneno, wa Ewropa bido bes o. Seba koçber qet qanûn nêame viraştene. Tirkan vanê; sûrîyeyij ameyê û ma rê cayêk veranêdayî la dewlete înan ra pere nêdano, pere teberî ra yeno. Tirkîya vana; bêrê ziwanê mi bimusî, ez do kar û cayêk bida şima; armanc asîmîlekerdiş o.”
‘Hetê huquqî de zî bêzane yê’
Medya Alkan qiseyê wina qedîna: “Cinî her ca derb wenî û şonê dewlete gerra kenî; çi heyf ke sazî û dezgeyê dewlete çikêk nêkenî. Heme şaredarî hem zî walîyîye na babete de kêm ê. Ma de zî kêmaney est ê, ganî seba koçberan zereyê şaredarî de zî cayêk bibinî. Koçber meseleyêka zaf muhîm a, çimkî bi koçberî hemdemêk abiyena, hemdemêk girêdeyena. Wa şaredarîye sey Serekîya Daîreyî koçberan ra awan bikera. Wa koçberan bizanê ke cayêk est o ke derd û kulê înan çareser beno. Seba ziwanî xebatêk bêro kerdene, weş o. Koçber çi heyf ke warê huquqî de zî bêzane yê, no ser ser medyaya sosyale de zî xebere bêrê viraştene. Seba hişyarbîyayîşê înan kuçeyan de wa pankartî bêrê elaqnayene.”
