Meclîsanê Ciwanan ê DBP û DEM Partî derheqê meşî ke do çarçeweya prosesê “Aştî û Komelê Demokratîkî” de 14ê Tebaxe de bêro viraştene, banê DEM Partî de eşkerayîyêke daye û va: “Ma do cuya sosyalîste ser o israr bikerê, ma do bi Rayberîya Azade xo rêxistine bikerê.”
Meclîsê Ciwanan ê Partîya Têdûştî û Demokrasî ya Şaran (DEM Partî) û Partîya Herêmanê Demokratîkan (DBP) derheqê meşî ke do 14ê Tebaxe de çarçeweya prosesê “Aştî û Komelê Demokratîkî” de virazê, banê Rêxistina DEM Partî ya Amedî de eşkerayîyêke daye çapemenîye. Aktîvîsta Têgêrayîşê Cinîyan ê Azadan (TJA) û îdarekarê MED-TUHAD-FED’î Orhan Işikî zî tewrê kombîyayîşî bîyî.
Ciwanan ard ziwan ke ê do sey meclîsê Ciwanan bi ruhêko rêxistinbîyaye dewe bi dewe, kuçe bi kuçe, taxe bi taxe û şaristan bi şaristan wezîfe û mesûlîyetê xo yê dewrê tarîxî bîyarê ca.
Metnê çapemenîye yo kurmanckî Sultan Yorulmaze wend û yo tirkî zî Yusuf Demîrpolatî wend.
‘Ma do her ca de xebata rêxistinkerdişî rê dewam bikerê’
Endama Meclîsê Ciwanan ê DBP’yî Sultan Yorulmaze dîyar kerd ke ê do sey meclîsê Ciwanan her warî de kar û xebatanê xo yê rêxistinkerdişî bîyarê ca û wina va: “Sey şima zî zanenê, bi mesajê Rayber Apoyî yo ke 4ê Nîsane de Meclîsê Ciwanan rê bi ‘Xo rêxistine bikerê, rêxistine bikerê!’, ma sey Meclîsanê Ciwanan ê DEM Partî û DBP’yî, kampanyaya xo ya bi nameyê ‘Ma cuya Sosyalîste ser o israr kenê, ma bi Rayberîya Azade xo Rêxistine kenê!’ daye destpêkerdene. Wexto ke kampanyaya ma dest pêkerd, o wext ra nat ma sey hêzê pêşengî û rayberî, rêxistinkerdiş û awankerdişê xîretanê seba awankerdişê komelêko aştîwaşt û demokratîk de dewam kenê. Vengdayîşo tarîxî yê 27ê Sibate, ruhê dewrê neweyî û ruhê averşîyayîşî sembolê newe ra bîyayîş, weşbîyayîş û estbîyayîşî yê. Senî ke ruhê averşîyayîşî guleyêka ke mezgê qelsî yê kurdî rê ameya eştene, vengdayîşê 27ê Sibate zî xala dewrêkê neweyî ya. Sey Meclîsanê Ciwanan, ma do bi rêxistinkerdişê xo dewe bi dewe, kuçe bi kuçe, taxe bi taxe û şaristan bi şaristan wezîfe û mesûlîyetê nê dewrê tarîxî bîyarê ca.”
‘Do bi ruhê embazîya komunalîste festîvale bêra viraştene’
Sultan Yorulmaze ard ziwan ke ê do bi ruhê embazîya komunalîste festîvale virazê û wina dewam kerd: “Konsera ma ya ke do bi sloganê ‘Bi Ciwananê Pêşengan Festîvala Komela Demokratîke’ bêra viraştene, do roja Pêncşemeyî 14ê Tebaxe saete 19:00 de bi yew meşî banê DEM Partî yê Amedî ra heta cayê konserî dest pêbikero. Dima ra festîvale do Meydanê Şaristanî yê qezaya Peyasî de dest pêbikero. Ma veng danê embazanê xo yê cinîyan ê welatperweran, Ciwananê welatperweran û şarê Amedî yê welatperwerî ke tewrê festîvala Ciwanan a ke do bi ruhê embazîya komunalîste bêra viraştene, bibê.”
Aktîvîsta TJA Hulya Alokmene zî qisey kerd û behsê têkoşînê cinîyan û ciwanan kerd û waşt ke her kes wayîrê têkoşînê dewrê neweyî vejîyo û veng da ke beşdarê çalakîye bibê.
Eşkerayîye bi berzkerdişê sloganê “Biciwîyo xoverdayîşê Ciwanan” qedîyaye.
