DEM Partî û serekê sazgehanê elewîyan Meclîsî de ameybî têhet û derheqê prosesî de kombîyayîş kerdbi. Serekê Pêroyî yê PSAKD’î Cuma Erçe va ke ê do partîyanê bînan ra zî waştişê kombîyayîşî bikê.
Serekê Pêroyî yê Komela Kulturî ya Pîr Sultan Abdalî (PSAKD) Cuma Erçe derheqê kombîyayîşî de ajansê PÎRHA rê qisey kerd.
Erçeyî vat ke înan kombîyayîşî de derheqê qetlîamê elewîyanê Sûrîye, prosesê aştî û vurîyayîşanê qanûnê bingehînî de qisey kerdo.
‘Ma waştişê xo rêz kerdî’
Erçe dîyar kerd ke ê aşmanê verênan de seba qetlîamsnê elewîyanê Sûrîye heme partîyanê Meclîsî reyde kombîyayîş kerdo û wina vat:
“Ma waştbî ke seba muşahadeyî grûbêk şêra Sûrîye û seba ney garantîya Dewleta Tirkîye û Milletanê Yewbîyayeyan hewce ya. Waştişê ma yo diyîn o bi ke korîdorê hetkarîya însanî bêro akerdene û sey hetkarîyî ke ma erdlerzî de kerdî, nê herêmanê Sûrîye de ke elewî yenê kiştene bikerê. Badê nê waştişan ma hirê reyî Wezaretê Karanê Zereyî û Wezaretê Karanê Teberî ra randevû waşt la cewabêko pozîtîf yan zî negatîf nêame dayene.”
“Ma qerar da ke partîyan reyde kombîyayîşan bikerê”
Erçe dîyar kerd ke Sûrîye de qetlîam dewam keno û sey sazgehanê elewîyan înan qerar dayo ke partîyan reyde kombîyayîşan bidê destpêkerdene û wina domna:
“Cinî rê, domanan rê zilm beno. Ma derheqê vurîyayîşê qanûno bingeyînî de zî qisey kerd. Eke komisyonêk awan bibo, ganî temsîlkarê ma zî tede ca bigîrê.”
Erçe va ke eke seba faydeyê welat û miletan bibo, ê do hem Abdullah Ocalan hem zî Tayyip Erdogan reyde kombîyayîşan bikê û qiseykerdişê xo wina qedêna: “Ma tim hetê miletan de benê. Eke rasterast seba faydeyê miletan bibo, ma do her kombîyayîşî bikê. La ma bawerî û prensîbanê xo ra qet tavîz nêdanê.”
