Dadîyê ke vera hêrişanê Awbendê Tişrînî Pirsûs de nobete de yê, înan venga her kesî da ke wayîrê Rojawanî vejîyê.
Dewleta Tirke 8ê kanûne ra nata hêrişê Awbendê Tişrînî û dormeyê ci yê Kobanê kena. Qezaya Nisêbînî ya Mêrdînî û qezaya Pirsûsî ya Riha de şar vera hêrişan sînorê Kobanê û Qamişloyî ser o nobete de yo.
Dadîyê ke vera hêrişanê Awbendê Tişrînî Pirsûs de sînorê Kobanê ser o nobete de yê, înan ajansê ma rê qisey kerd.
Nesîbe Kuçukkiliç: Ma seba haştîye tîya de yê. Ma seba way û birayanê xo tîya de yê. Ma hinî şer û mergê domanan nêwazenê. Rojawan binê zulmî de yo û ma nê zulmî qebul nêkenê. Heta ke zulm biqedo ma tîya de yê. Ma mergî ra nêtersenê la ê cenazayanê ma ra tersenê. Rojawan seba ma her çî yo; Rojawan seba ma Rayberîye yo.
Rahîme Kizilkaya: Ma haştîya wayûbiratîye wazenê. Ma seba haştîye tîya de yê, seba cuyêka têdûşte têkoşîn kenê û seba domananê xo têkoşîn kenê. Rojawan ma yê! Ma wazenê ke hêrişê vera Rojawanî biqedê. Ma wazenê ke hinî Rojawan aram bibo.
Meryem Soylu: Bi taybetî selamê şarê ma şawena Rojawanî ke xo ver dano. Şarê kurdî û her kes ganî wayîrê Rojawanî vejîyo. Êyê ke haştîye rê destê xo derg kenê hetê bînî ra hêrişê Rojawanî kenê. Ma wazenê mîyanê haştîye de biciwîyê. Se beno wabibo ma wayîrê Rojawanî vejîyê.
Şahîle Gulten: Seba ke hêrişê vera Rojawanî biqedê ma tîya de yê û têkoşîn kenê. Hinî bes o! No erd erdê ma yo. Ma seba ke bibê vengê Rojawanî tîya de yê. Rojawan zerrîya kurdan û Kurdîstanî ya. Eke Rojawan ser bikewo şarê kurdî bi temamî do ser bikewo.
