DBP çarçewaya “Vengdayîşê Aştî û Komelo Demokratîkî” de bi sloganî “Kuçeyan ra heta taxan, heta şaristanan ma azadîye rêxistin kenê” gama rêxistinkerdişî dano dest pêkerdene.
Partîya Herêmanê Demokratîke (DBP) kombîyayîşê Meclîsê Partî (PM) 13ê nîsane de Amed de organîze kerdbi. 16ê nîsane de zî encamnameyê kombîyayîşî raya pêroyî reyde pare kerdbi. DBP’yî qerar da bi ke do aşma gulane de seba vatişê vengdayîşê tarîxî ya Rayberê Şarê Kurdî Abdullah Ocalanî û pîlkerdişê rêxistîna xo dest bi zîyaretanê keyeyan û kombîyayîşanê şarî bikerê. Endamê Meclîsê DBP’yî yê Partîyî Bunyamîn Şeker derheqê amanc û xebatanê gama rêxistinkerdişî ajansê ma (AW) rê qisey kerd.
‘Bar keweno milê ma ser o, ma do wezîfeyê xo bîyarê ca’
Bunyamîn Şeker îfade kerd ke 27ê sibate de Rayberê Şarê Kurdî Abdullah Ocalanî vengdayîşê “Aştî û Komelo Demokratîk” kerd û vat: “No vengdayîş hem seba komelî hem seba dewlete bi. Ma zî sey sîyaseto demokratîk seba ke no vengdayîş hîna baş bêro fehmkerdene, ma bi sloganî “Kuçeyan ra hetan taxan, heta şaristanan ma azadîye rêxistin kenê” gama rêxistinkerdişî daye dest pêkerdene. Xora xebatê ma yêke dewam kenê, est ê. Ma do aşma gulane de zî bi na game kuçe bi kuçe, taxe bi taxe, keye bi keye şarê xo reyde kom bibê. Ma do derûdorê nê vengdayîşî de senî bibê xeleqêk pîya nîqaş bikerê. Seba ke nê prosesî de rol û mîsyonê şarî zaf muhîm o. Ma xo rêxistin nêkerê, şarê rêxistin nêkerê, ma bipawê, ma nêeşkenê serkewê. Ganî ma nêvajê xo ra Birêz Ocalan dewlete reyde pêvînayîşan keno, do heme çî wina çareser bibo. Eke ma, sazîyê ma, şarê ma wina bifikirîyê, no proses sernêkeweno. Sey Partîya Herêmanê Demokratîke (DBP) ma nê prosesî de berpirsîyarîya xo vînenê. Seba ney zî baro ke keweno milê ma ser o ma do bi ca bîyarê.”
‘Ma do xo heme qeza û şaristananê Kurdîstanî de rêxistin bikerê’
Bunyamîn Şeker sa zanayene ke ê do nê prosesî de hem xo hem zî şarê xo rêxistin bikerê û wina dewam kerd: “Nê prosesî de seba ke DBP rol û mîsyonê xo bîyara ca, vengdayîşê Aştî û Komelo Demokratîk rêxistin bikera; heme şaristan û qezayanê Kurdîstanî de sey partî xo rêxistin bikera, ma qerarê na game girewt. Ma bawer ê ke ma do nê amancê xo de zî serkewê.”
‘Ganî şertê Abdullah Ocalanî bibedilîyê’
Bunyamîn Şeker dîyar kerd ke amancê komelê demokratîk demokratîkkerdişê welat o û wina vat: “Ma vanê komara demokratîke, yanî komare yewperestî ra bibedilnê û ver bi demokrasî berê. Demo ke demokrasî bibo, ma zanê ke her kes do bi hewayêko ewle, ziwan û kulturê xo reyde, bi reng û vengê biciwîyê. Amancê komelo demokratîk zî no yo. Muxatebêkê nê prosesî zî dewlete ya. Lazim o dewlete hetê qanûnî ra gaman bierza. Ganî qanûnan de bedilîyayîşan bikera. Zafrengî, zafkulturî û ziwanê dayîke de perwerdeyî esas bigîra. Lazim o bi lez meclîsî de komîsyono ke nê prosesî taqîb bikero, bêro awankerdene. Ya tewr sereke zî ganî şertê birêz Abdullah Ocalanî bibedilîyî. Şertanê tecrîdî de Birêz Abdullah Ocalan nêeşkeno rol û mîsyonê xo bîyaro ca. Ewil ganî tecrîd hewanîyo û azadîya fîzîkî ya birêz Ocalan bêra caardene.”
‘Gere her kes derûdorê na game de kom bo’
Bunyamîn Şeker tewr peyên îfade kerd ke her keso ke welatparêz o, kesê ke demokrasîyî pawenê nê prosesî de wayîrê berpirsîyarî yê û wina domna: “Gere her kes rol û mîsyonê xo bivîno. Ma veng danê heme şarê xo ke gere her kes derûdorê na kampanya de kom bibo, bi fikranê xo, bi rexneyanê xo û bi hêzê çalakbîyayîşê xo hêz bido nê prosesî.”
