Rêxistina DBP’yî yê Amedî do 27ê nîsane de Kongreya Xo ya Awarte ya 6. virazo. Hemserekanê DBP’yî yê Amedî Mehmet Şîrîn Gurbuz û Sultan Yaray şar dawetê kongreya xo kerd û dîyar kerd ke kongreya înan do biba wesîleya rêxistinkerdişê aştî û komelêko demokratîk.
Rêxistina Partîya Herêmanê Demokratîk (DBP) ya Amedî do bi sloganî “Bi Komelê Rêxistinkerdeyî Ma Ver Bi Azadîye Ray ra Şonê” do 27ê nîsane roja yewşeme saete: 11.00î de Salona Veyveyî ya Ayaz Elgansî de Kongreya Xo ya Awarte ya 6. virazo. Hemserekanê DBP’yî yê Amedî Mehmet Şîrîn Gurbuz û Sultan Yaray babete ser o ajansê ma rê qisey kerd.
‘Ma ver bi azadîye ray ra şonê’
Hemserekê DBP’yî yê Amedî Mehmet Şîrîn Gurbuz dîyar kerd ke do kongreya xo bi coşêko xurt virazê û wina va: “Ma do Amed de bi rêxistinkerdişêko xurt kongreya xo virazê. Ma ver bi azadîye ray ra şonê. Seba ey na kongreya ma ya Amedî zaf avzel a. Seba tecrîd bêro hewanayene û komelêko demokratîk bêro awankerdiş, rayîrşîyayîşê ma dewam keno. Ma vengê şarê Amedî danê ke beşdarî kongreya ma ya Amedî bibê û hetkarîya ma bikerê.”
‘Ma wazenî goreyê ruhê pêvajoyî kongre virazê’
Hemsereka DBP’yî ya Amedî Sultan Yaray zî vengda şarê Amedî û şaristanê dorûverî ke hêz bidê kongreya înan û wina domna: “Ma wazenî goreyê ruhê pêvajoyî kongreya xo virazê. Komelo rêxistinkerde, komelo azad o. Bêrê ma na kongre de seba rêxistinkerdişê xo, seba azadîya şarê kurd û şaranê Kurdistanî mesajêko xurt bidê. Hêvî û waştişê ma no yo ke do na kongre hetkarî bida nê pêvajoyê ke bi vengdayîşê Rayberê Şarê Kurdî Birêz Abdullah Ocalanî dest pêkerd. Dimayê nê vengdayîşî şarê kurd bi pratîkê xo pêvajoyêko newe da destpêkerdiş. La nika hetê dewlete ra tu gamê pozîtîfî nêameyî eştiş. Dewleta Tirkîya ganî cewab bida nê pêvajoyî. Ganî Birêz Abdullah Ocalan bi hewayêko fizîkî azad bibo û o bi xo nê pêvajoyî masaya muzakereyî de aver bero. Wa şarê ma bêro hetkarî bikero ke ma pîya kongreya xo virazê.”
