DBP’yî derheqê Komployê Mîyanneteweyî yê 15ê sibate ke vera Rayberê Şarê Kurdî Abdullah Ocalan eşkerayî daye û dîyar kerd ke ganî adres û îradeyê çareserî Rayberê Şarî Kurdî Abdullah Ocalan azad bibo.
Partîya Herêman a Demokratîk (DBP) derheqê serrgêra 27. ê komployê mîyanneteweyî ke 15ê sibate 1999î de vera Rayberê Şarê Kurdî Abdullah Ocalan virazîya bi sernayê “Adres û îradeyê çareserî dîyar o; ganî Birêz Ocalan azad bibo” eşkerayîyêke nuştekî weşanaye.
DBP’yî Komplo vist vîr û wina vat: “Komployê 15ê Sibate yo Mîyanneteweyî yo ke vera Rayberê Şarê Kurdî Abdullah Ocalanî virazîya ser o 27 serrî vîyartî. Ma reyna dîyar kenê ke nê hewldayîşê sîyayî vera îradeyê azadî yê şaran û qerardarîya pêt a ke Îmrali de bi destê Birêz Ocalanî nîşan dîyaye vîndî kerd. Komployo mîyanneteweyî sey netîceya stratejîyê dîzaynkerdişê Rojhelatê Mîyanênî yo ke hetê hêzanê hegemonîkan ra seba menfaetanê înan virazîya, qewimîya. Nê prosesî de vera krîzanê ke modernîteya kapîtalîste afernena, teorîya Modernîteya Demokratîk a ke bi destê Birêz Ocalanî yena pêşkêşkerdene, semedê şaran bîya lulîya helmî. Komployî reyde ame waştene ke no helm bibirîyo, şarê herême dekewê mîyanê şer û pêkewtişanê neteweperestan ê bêpeynîyan. Labelê, 15ê Sibata 1999î ra nat Abdullah Ocalano ke binê şertanê tecrîdî de yeno tepiştene, bi paradîgmaya ke xurt kerde, senaryoyanê “tesfîyeya şaran” û “kaosî” pûç kerdî. Vera xîretê pêverdayîşê şaran ê hêzanê Modernîteya Kapîtalîstê ke komplo organîze kerd û dest pê Şerê Dinya yo 3. kerd, Birêz Ocalanî zîndanê Îmrali ravurna bi wendegehê xoverdayîş û aştîye, nê senaryoyê sîyayî rê “Manîfestoyê Komelê Demokratîkî” reyde cewabêko tewr hêzdar da.
‘Verva Senaryoyanê qilêrinan cewabêko hêzdar da’
Ewro bingehê rijîyayîşanê komelkîyan, şeran û krîzanê kûranê ke Kurdîstan, Tirkîya û Rojhelatê Mîyanênî de peyda bîyî de polîtîkayê bêçareserîyê ke bi israr persa kurdan de ramînê û rejîmê tecrîdo ke Îmrali ser o domîyeno, ca genê. Rixmê nê derûdorgirewtişî, ewro fikrîyatê çareserî yê Birêz Ocalanî her çengeyê Rojhelatê Mîyanênî de, bitaybetî modelê azadî yo ke Rojawan de ame caardene, bîyo yew rayîrê xelase yê şaran. Raverşîyayîşê sîyasî û leşkerîyê ke Sûrîye de qewimîyayî, gêrayîşê statuyî û serobinbîyayîşê muwazeneyanê herêmkîyan îspat kerd ke analîzê “Neteweya Demokratîko” ke Birêz Ocalanî serran verî formule kerd, çiqas heyatî yo. Aramîya Sûrîye û pêro herême bêguman şinasnayîşê estîya şarê kurdî û muxatabgirewtişê îradeyê çareserî yo demokratîk ê Birêz Ocalanî reyde mumkun o.
‘Bi mîlyonan kesî aştî pawenê’
“Vengdayîşê Aştîye û Komelê Demokratîkî” yê Birêz Ocalanî yo ke 27ê Sibate de şênber bî, têna eşkerayîya nîyetî nêbî, eynî dem xerîtayêka rayîrî ya tarîxî ya ke seba demokratîkbîyayîşê komelî û awankerdişê aştîya rûmetdare virazîyaye bî. Îradeyê muzakereya demokratîka ke nê vengdayîşî de şênber bî, ewro hêvîya tewr pîle ya bi mîlyonan kesanê ke aştîye pawenê ya. Her pêvînayîşo ke Îmrali de ramîno, yeno manaya awankerdişê îtîfaqê stratejîkî û newe ra ronayîşê têkilîyanê tarîxîyan ê mîyanê şaranê ke yenê cirakerdene. Rayapêroyî pawitêne ke no îrade sey taktîko sîyasî nê, sey kilîtê çareserîyêka mende bêro naskerdene; pergalê tecrîdî biqedîyo, azadîya Birêz Ocalanî bêro peydakerdene û zemînê muzakereya demokratîke garantîyanê huqûqîyan reyde bêro ware ameyene.
‘Adresa Çareserî zelal a’
Ganî nêro xovîr ra kerdene ke projeyê “Aştîye û Komelê Demokratîkî”, eynî dem têkoşînê ronayîşê Komara Demokratîk o. No proseso krîtîko ke tede şewato herêmî sere de Tirkîya û Kurdîstan pêro herême de vila bî, fikrîyat û hêzê çareserîye yê Birêz Ocalanî, şaranê ma rê firsendêko pîlo ke yeno pêşkêşkerdene yo. Sîyasetê înkarî yo ke bi komployê 15ê Sibate ame hedefgirewtene, ewro sayeyê îradeyê aştî yê Birêz Ocalanî yeno pûçkerdene. Wayîrvejîyayîşê nê îradeyê tarîxî, vera aqlê komplokerî vindertiş û awankerdişê demê ameyoxê azadî mesuldarîya ma ya hempar û wezîfeyo misoger o. Adresa çareserîye zelal a, îradeyê ci eşkera yo; vera nê îradeyî hîsgêr nêbîyayîş ameyoxî tarî keno.”
