Newroz ra nahetêrî hêrîşê sîyasî yê vera kurdan roj be roj benê zêde. Merkez û qezayanê Agirî de sereştişê 21 kes ame destbendkerdene. Partîya Herêmanê Demokratîkan hesabê xo yê dîjîtalî de vera nê hêrîşan eşkerayîyê dê û hêrîş şermezar kerd.
Partîya Herêmanê Demokratîkan (DBP) eşkerayîye de veng da va kesê ke ameyî destbendkerdene ca de bêrê serbest veradayene.
Eşkerayî wina ya:
Hêrişê sîyasî yê ke şaristanê Agirî de bi bahaneya fîrazkerdişê Newroze vera şarê ma qewimîyayî û hema zî domîyenê, netîceyanê nêrazîbîyayîşê vera têkoşînê şarê kurdî yê heqanê kulturkî û sîyasîyan ra yew ê.
Şarê ma bi sîyasetêko demokratîk raşteyanê Newroze de waştişê xo yê aştî û çareserîyêka mende ard ziwan. La, no reftaro demokratîk bi destê îqtîdarî operasyonanê sîyasîyan reyde ame cewabkerdene.Nê caardişê ke duştê huqûqî yê hewldayîşanê çareserî û aştîye rê xizmet nêkenê, eksê ci zirarêkê pîlî danê prosesî. Nê semedî ra îradeyê çareserîya demokratîke û azadîya ke bi mîlyonan kesan raşteyanê Newroze de ard ziwan, ganî bi hêriş û operasyonanê sîyasîyan nêro cewabkerdene.
Sey Partîya Herêmanê Demokratîkan ma veng danê îdarekaran ke; desinde kesê ke ameyî destbendkerdene bêrê serbest veradayene. Reyna seba averşîyayîşê prosesê aştî û komelê demokratîkî zî ma vengê xo dubare kenê ke; ganî îqtîdaro sîyasî caardişanê ke sîyaseto demokratîk hedef girewt ra fek vera bido û herinda operasyonanê sîyasîyan, herinda caardişanê ke îradeyê şarî çin kenê de wa gamanê bîyaye û şênberan bierzo ke prosesê çareserîya demokratîke raver şero.
