DAD’î serrgêra 87. ya Qirkerdişê Gedîgê Zînî (Zînî Gedîgî) de kesê ke cuya xo vindî kerdê, yad kerd û wina va: “Mekanê sey Gedîgê Zînî, mekanê vîrî yê. Nê mekanê eynî demî de neynikê polîtîkayê dewlete yê înkar û asîmîlasyonî yê.”
8ê Tebaxe 1938î de dewa Erzînganî ya ke Koyê Munzurî ra ewnîya de, 97 welatijê elewî, mekanê Gedîgê Zînî de ame qetilkerdêne. Serrgêra Qirkerdişê Gedîgê Zînî ser o Komeleyê Elewî yê Demokratîkî (DAD) beynato nuştekî da.
Beyanat wina yo:
“Ma canê ke mekanê Gedîgê Zînî de ameyê qetilkerdene vîra nêkerd û vîra nêkenîme!
87 serrê verê serra 1938î de sey verdewamîya Qirkerdişê Dêrsimî, mekanê Gedîgê Zînî de qirkerdişêko gird ciwîyaye. 97 canê keyeyanê xo ra bi zorî ameyê girewtêne û mergî ra ameyê berdiş. Bi zorî sunguyan canê elewîye berdê mekanê Gedîgê Zînî û uca de zî qetil kerdê.
Komelkîya Elewî ya Heqî mîyanê raştîya kulturê kurdî de xo înşa kerd la belê dewleta turk-îslamî xo ra na komelkî sey hedef girewt û mekanê Gedîgê Zînî de qirkerdişêko gird viraşt. Sey Gedîgê Zînî xeylî qirkerdişî est ê. Mekanê sey Gedîgê Zînî, mekanê vîrî yê. Nê mekanê eynî demî de neynikê polîtîkayê dewlete yê înkar û asîmîlasyonî yê.
Çi heyf ke dewleta tirke hetanî nika Qirkerdişê Dêrsimî û qirkerdişê bînî reyde rî bi rî nêame. Ganî arşîvî bêrê akerdêne, şarê Dêrsimî ra ozur bêro waştêne. Ma kesê ke Qirkerdişê Gedîgê Zînî de cuya xo vindî kerdê, yad kenê û verê înan de zî milê xo çewt kenê. Mazlum bêrçare nîyo!”
