Platformê Dezgehanê Demokratîkan, 1ê teşrîna verêne de bi sloganê “Bi hêvî ma ver bi azadîye rayrea şonê” seba rayîrşîyayîşî ke Amed ra heta Ankara do bêro kerdene, vengdayîşê beşdarîye kerd.
Platformê Dezgehanê Demokratîkan, bi pêşengîya Têgêrayîşê Cinîyanê Azadan (TJA) 1ê teşrîna verêne de bi sloganê “Bi hêvî ma ver bi azadîye rayra şonê” Amed ra heta Ankara rayîrşîyayîşî ser o ke do bêro kerdene, Rêxistina Şaristanî ya Partîya Têduştî û Demokrasî ya Şaran (DEM Partî) ya Amedî de beyanatêk da. Hemserekê Şaristanî yê Partîya Demokratîke ya Herêman (DBP) Ehmed Doganî îfade kerd ke seba azadîya Rayberê Şarê Kurdî Abdullah Ocalanî 250 cinîyî 1ê teşrîna verêne de do rayîrşîyayîşêk bikerê. Doganî ke îfade kerd ke heta ke Rayber Apo azad bibo do aktîvîteyanê xo girdêr û dewam bikerê, wina vat: “Azadîya Rayberê Şarê Kurdî do azadîya cinîyan û şaranê bînan zî bîyaro. Seba ney ma heme embazanê xo 1ê teşrîna verêne de peyê Ceylan Karavîl AVMî Dingê Çeşmeyî de pawenê.”
Hemsereka Şaristanî ya DBP’yî Ruçem Vefa Elyakut wina vat: “Bi qerardarîye û bawerîyêka girse ma do nê rayîrşîyayîşî bikerê. No rayîrşîyayîş do bibo rayîrşîyayîşê cigêrayîşê azadîye û bi pêşengîya cinîyan averşîyayîşê komelê demokratîkî. Seba azadîya fîzîkî ya Rayberê Şarê Kurdî ke azadîya xo ra fek verdayo û azadîya komelî dima kewto. Rayîrşîyayîşî de 5 waştişî 7 nuqta û 7 sernuşteyî do bibê. Rayîrşîyayîşê xo de ma Amed ra dest pêkenê û Ankara de bi Kombîyayîşê Grûbe qedînenê. Riha, Dîlok, Edene, Mersîn û Ankara de do biqedîyo. Bi nê rayîrşîyayîşî ma do azadîya fîzîkî ya Rayberê Şarê Kurdî Birêz Ocalanî û sîstemê bingeyê aştîya komelkî ser o biwazê. Azadîya Rayberê Şarê Kurdî tena azadîya yew ferdî nîya, azadîya cinîyan, ciwanan û pêroyê şaranê dinya ya. Têkoşîno ke bi pêşengîya cinîyan yeno kerdene, her game reyde vera sîstemê patrîarkal, vera tecrîdî qîrayîşêk o. Rayîrşîyayîşêk o ke cinîyî vanê ‘êdî bes o’. Na çarçewe de vengdayîşê ma pêroyê cinîyan rê, pêroyê şaran rê wina bo: Her cinîye yew gam a, her game yew xoverdayîş o, her xoverdayîş zî yew hêvî ya. Bêrê nê rayîrşîyayîşê hêvîye de cayê xo bigîrê. Hem seba azadîya Rayberê Şarê Kurdî Birêz Ocalanî hem zî seba azadîya pêroyê şaranê dinya vengê xo berz bikerê.”
