Rayberê Şarê Kurd Abdullah Ocalan Girawa Îmraliyî ra vengdayîşê “Aştî û komelo demokratîk” kerd. No vengdayîş Rojhelato Mîyanên û dinya de do bibo semedê pêvajoya bedilyayişî û no bedilyayiş zî do sey perpirike tesîr bikero. Êdî seserra diyine de dem demê komara demokratîke yo.
1ê teşrîna verêne de Serekê MHP’yî Dewlet Bahçelî Meclîs de zîyaretê grûba DEM Partî kerd û destê xo Hemserekanê DEM Partî rê derg kerd . Dima waşt ke Rayberê Şarê Kurd Abdullah Ocalan Meclîs de vengdayîş bikero û vajo ke rêxistina xo fesih bikero û çekan verdo. Nê vengdayîşî ser o bi 23ê teşrîna verêne de Wekîlê DEM Partî Omer Ocalan bi nameyê keyeyê xo şî Îmrali û Rayberê Şarê Kurd Abdullah Ocalanî reyde pêvînayîşêk kerd. Demê winasî de Abdullah Ocalanî mesajêko kilmek û xorîn da şarî. Va ‘Tecrîd dewam keno. Eke şert û çarçewa bêrê viraştene, ez hetê teorîk û pratîkî ra amade ya ke zemînê şerî bikera zemînê huqûqî û sîyasî.’
Badê cû bi nameyê DEM Partî yew heyet ame organîzekerdiş û 22ê kanûne û 28ê kanûne de di rey şîyê Îmralî û Abdullah Ocalanî reyde pêvînayîşî kerdî. Rayberê PKK’yî Abdullah Ocalanî pêvînayîşê 28ê kanûne de xerîtaya ke 7 madeyan ra yena meydan, şarî reyde pare kerde û berpirsîyarî daye meclîs, partîyê sîyasî, rêxistinê komelkî û heme beşanê şarî. Badê ke heyet zaf partî û rêxistinan reyde pêvînayîşî kerdî, 27ê Sibate de reyna şî Îmrali û agêra. Na rey Rayber Abdullah Ocalanî beyanatêko sey manîfesto şarî reyde pare kerd. Na roje ra nika rojeva Tirkîya hetta dinya bedilya.
Merdim xo înşa keno
Goreyê teorîya kaosî, Daristanê Kurdistan de perpirikêk pelê xo bido piro, do Rojhîlato Mîyanên de bibo semedê qewimîyayîşanê girdan. Yanî pergal de xeteyêko şenik, netîceyê balkêşî ra rayîr akeno. Kaînat de her çik gandar o û yewbînan ra girêdayî yo, no ser zî yewbînan ra tesîr kenê. Her kes goreyê payê xo bedilyeno. Merdim zî xoza de her tim mîyanê bedilyayîş û xo înşakerdişî de yo.
Rayberê Şarê Kurd Abdullah Ocalan Girawa Îmraliyî ra vengdayîşo tarîx kerd. No vengdayîş, Rojhîlato Mîyanên û Dinya de do bibo semedê pêvajoya bedilyayişî û no bedilyayiş zî do sey perpirike tesîr bikero. Nika ra vengdayîşê ci pêroyîya komelî de tesîrê xo nîşan da.
Her kes ra tesîr kerd
Vengdayîşê Rayberê Şarê Kurd Abdullah Ocalan hem tesîrê kesê azadîhesî ra hem zî muxalîfan ra kerd, Tirkîya de û şarê kurd zî tesîrêko pozîtîf la negatîf zî kerd. Kesê ke azadî û aştî wazenê amancê vengdayîşî fam kerd û goreyê ci zî wazenê verpirsîyarîya xo bîyarê ca.
Kesê ke verba nê vengdayîşî de zî vindenê, wazenê vengdayîşo tarîxî bêhêz bikerê û maneyê ci bibedilnê û zeyîf nîşan bidê. Şinasnayîşê îradeya şarê kurdî, xususî heqê bingeyî de bêro kerdene, seba têhet cuyayişî ra bibo firsetêko gird. Eke Tirkîya welatêko demokratîk bibo, do azadîya şarê kurdî zî bi ziwanê dayîka xo perwerde bivîno û bibo netewêk xoser.
Ercnayîşê ezber û klîşe
Kesê ke nêwazenê na pêvajo serkewte bibo, ercnayîşanê ezber û klîşeyan kenê. Têkoşînê şarê kurdî sey teror nîşan danî, bi seserrana ke no feraset xo dibare keno, êdî polîtîkayê înkar û îmhayî çin bî yanî qedîya. Sîyasetê faşîstî yê Dewleta Tirke xo bi xo nêame na daraxe. Rayberê Şarê Kurd Abdullah Ocalan û PKK, bi metod û têkoşînê xo înan nêçare çareserîye kerd.
Tirkîya de do mekanîzmayê parçebîyayîşî bikewo merîyetî
Ya nêçare çareserîye qebul bikero ya zî çin bibê. Şero ke dewam keno ra tena şarê kurd ra nê şarê Tirkîya û Dewleta Tirke zî zirar dî û zirar bivînî zî. Şer dewam bikero do şarê kurd bedel bibo raşt o la Dewleta Tirk de zî mekanîzmayê parçebîyayîşî do bikewo merîyetî.
Rayberê Şarê Kurd Abdullah Ocalan verpirsîyarîyêka gird girewto ser milê xo, tay vanê; do ma PKK teslîm bigê, tay zî vanê; PKK xo bi xo teslîm beno. Wayîrê vatişê nê merdiman tena rayîrê cînayet û sîyasetê qirkerdişî zanenê. Wazenê sereyê merdiman de têmaney bivejî.
Rayberê Şarê Kurd Abdullah Ocalan paradîgmaya modernîte ya demorkatîke her tim behsê rayîro hîreyin keno. No rayîr rayîrê înşakerdişê komelê demokratîk û aştî yo. Şarê kurd nê mahkumê sîyasetê bêçare yo.
Serkewtişê sîyasetê demokratîk û aştîye
Eke projeya komelo demokratîk û aştî Tirkîya û Kurdistanê Bakûrî de serkewte bibo, do no serkewtişî ra çar parçeyê Kurdistanî zî nasîbê xo bigê. Feshkerdişê PKK’yî sey çinbîyayîşê têkoşê şarê kurd name bêro kerdene, xeteyêko gird o. 40 serrê ra pey mabenê PKK û Dewleta Tirke şer lazim o newe ra bêro ercnayîş. PKK bi têkoşînê xo azadîya şarê kurd hetanî na daraxe ard. 40 serrê verê behsê şarê kurd nêameynî kerdiş nika heme bi desan wekîlê înan hem zî bi desan şaredarîyê înan est ê. Heme dinya Rojawan û çar parçeyê Kurdistanî de têkoşînê xususî cinî û camerdê kurdan dî. PKK, şarê kurd de hişmendîya netewbîyayîşî awan kerd. Na hişmendî do nika ra pey şarê kurd û merdimeyîye ra zî xizmet bikera.
No hema destpêk o, no peynîya têkoşînê azadîye nîyo.
