Verfeka DEM Partî Ayşegul Dogan derheqê prosesî de agahî dayî û va ke hewtêna seba çekronayîşî amadekarî yena kerdiş û qerarê kongre do Herêma Federale ya Kurdistanî de bêro caardiş.
Verfeka DEM Partî Ayşegul Dogan peynîya kombîyayîşê MYK’yî de derheqê prosesî de qisey kerd. Ayşegul Dogan bale ante çîyanê ke MYK’yî de ameyî qiseykerdiş ser o û wina vat: “Ma êdî eşkenî vajî ke prosesêi de ma vîyartê merheleyêko bîn. Nê merheleyî de zî tewir bi tewir gamî est ê. Nînan ra yew zî Meclîs de awankerdişê komîsyonî yo. Ma wazenî awankerdişê nê komîsyonî konsensus bibo. No komîsyon nê prosesî de do rolêko gird kay bikero.”
Ayşegul Dogan dîyar kerd ke ê wazenî bi mutabakatî no komîsyon bêro ronîyayîş û wina domna: “No komîsyon ganî bi qanûnî bêro pawitiş, seba ke xebatanê xo bi rehetî bikero. Ma aştîya komelî pawenê. Ma do pisporan ra seba averşîyayîşê prosesî raporan zî biwazî. Ganî binê banê komîsyonî de mekanîzmayî bêrê ronayîş ke beşdarîya zafrengînîye biba. Nê komîsyonî de tena partîyê ke Meclîs de ca gênê nê, partîyê ke Meclîs de nîyê, ê zî bieşkê beşdar bibê. No zî xurtbîyayîşê komîsyonî ser o avzel o.”
Roja çekronayîşî dîyar nîya
Ayşegul Dogan persê roja çekronayîşî ser o wina va: “Ma hewtêna pawenê ke goreyê vengdayîşê Birêz Ocalanî yê 27ê sibate gamê şenber bêrê eştiş. Ma nêeşkenî seba çekronayîşî roje bidê. Na babete de muxatabî agahî bidê hîna raşt beno. Ma paweyê caardişê qeraranê kongre yê. Do çekronayîş Herêma Federale ya Kurdistanî de bêro kerdiş la şaristan dîyar nîyo. Ganî nê prosesî de çekî bêveng bibê, ma nika paweyê mesajê Birêz Ocalanî yê. Mesajê Birêz Ocalanî do bi vîdeo bêro dayîş yan zî do nuştekî bo haya ma tira çin a. La ma hêvî kenê ke bi vîdeo bo.”
