Bi îdiaya ke “Serekkomarî rê heqaret kerdo” serrêk û 5 aşmî û 15 roje cezaya hepsî Selahattîn Demîrtaşî rê ameye dayene. Hemserekê Pêroyî yê DEM Partî Tuncer Bakirhanî vera dayîşê cezayî reaksîyon mojna.
Bi baxaneyê qiseykerdîşanê ke mabênê serranê 2015-2016î de kerdê, derheqê Hemserekê Pêroyî yê HDP’yî yê verê Selahattîn Demîrtaşî de bi îdiaya “serekkomarê rê heqerat kerdo” dewa ameybi akerdene. Roniştîşê qerarî yê dewaya 14. Mehkemaya Cezayanê Pêroyî ya Mersînî ame viraştene. Demîrtaş tewrê roniştene nêbi la avûkatê ey amade bi.
Avûkatan hemverê mutala de wext waşt la hakimî semedo ke roniştişo binî de wext dabî nê waştişî red kerd. Nayê ser o avûkatan semedo ke heqê pawîtene yê edîlane ameyo binpaykerdene, waşt ke hakim bêro vurnayene. No waştiş zî ame redkerdene. Hakimî vat ke waştena tewrê Demîrtaş yê dewaya bi îdiya “ewleyî” ameyê redkerdene.
Mehkema seba qiseykerdîşê Demîrtaş yê ke Mersîn û Amed de bi îdiaya “pêdima serekkomarî rê heqaret kerdo” serrêk û 5 aşmî û 15 rojî cezaya hepsî daye Demîrtaşî.
Bakirhanî reaksîyon mojna
Hemserekê Pêroyî yê DEM Partî Tuncer Bakirhanî hesabê xo yê X’î de ser o vera dayîşê cezaya hepsî reaksîyon mojna û vat: “Cezadayîşê hemrayê ma Selahattîn Demîrtaşî ke bi baxaneyê Serekkomarê rê heqaret kerdo qebul nêkenê û red kenê. Ma nê qerarî nas nêkenê.
Qerarê bi tewirî vernîya awankerdişê aştî de astengîyanê pîlan vejenê. Nê qerarê winasînî bêedaletî kenê gird û derbe danê hêvîya aştî. Ganî rêzdar Demîrtaş û heme girewteyê sîyasî bilez bêrê veradayene. Rayîrê aştî bi qerarê mehkemeyanê derbekaran nê bi azadîye û edalet eşkeno bêro akerdene.”
