Şofora Şaredarîya Amedî ya Şaristanê Girdî Emel Menekşe Şene dîyar kerd ke 15 serrî yo şofortî kena û vat: “No 20 rojî yo zî ez bi hewayêko aktîf şaredarî de şofortîya otobusî kena. Ez wazena heme cinîyan rê biba nimûne. Wa bizanê ke zereyê înan de cewherêko xurt est o.”
‘Ez wazena heme cinîyan rê biba nimûne’
Şofora Şaredarîya Amedî ya Şaristanê Girdî Emel Menekşe Şen hîkayeya şofortîya xo ser o, amancê xo ajansê ma rê qisey kerd. Emel Menekşe dîyar kerd ke 15 serrî yo şofortî kena û vat: “No 20 rojî yo zî ez bi hewayêko aktîf şaredarî de şofortîya otobusî kena. Ez wazena heme cinîyan rê biba nimûne. Wa bizanê ke zereyê înan de cewherêko xurt est o. Wa cinî xo bivînê.”
‘Her kesî mi ra bawer kerd’
Emel Menekşe da zanayene ke demo ke aye seba şofortîya otobusî muracat kerdo, derûdorê aye paştî daya û vat: “Her kesî vat ma to ra bawer kenê. Mêrdeyê mi, keyeyê mi, her kesî paştî daye mi. Paştîdayîşê înan nêbiyêne belkî mi nêşinayêne wina rehet bixebitîya. Raywanî şofortîya mi ra keyfweş ê û paştî danê mi. Tena peyayî zehmetî danê mi. Karêko zehmet o la demo ke meridm ci ra hes bikero, eşkeno nê zehmetîyan zî derbaz bikero.”
‘Demo ke dayîkî mi vînenê zaf keyfweş benê’
Menekşe Şen îfade kerd ke cayê cinî her ca yo û qiseykerdişê xo wina domna: “Ez sey dayîkêk hem gedeyanê xo ra ewnîyena hem zî nê karî kena. Ma eşkenê heme karan bikerê. Wa tu cinî nêvaja ma nêzanê, ma nêeşkenê. Eke cinî biney bicesaret bibê, eşkenê heme karî bikerê.” Menekşe Şen keyfweşîya xo ya seba nêzdîbîyayîşê welatijan îfade kerde û vat: “Bi taybetî demo ke dayîkî mi dîreksîyon ser o vînenê zaf keyweş benê. Na keyfweşîya înan zî mi hîna zaf bicesaret kena û kena ke ez hîna zaf nê karî ra hes bikera. Hûmara ma şoforanê cinîyan 12 a. Ez hêvî kena ma hîna zaf bibê.”
