Platformê Sazgehanê Demokratîk qezaya Dêrikê ya Mardînî de rayîrşîyayîşêk organîze kerd. Zaf kesî ke mîyanê înan de parlemanterê DEM Partî, hemşaredarî, endam û îdarekarê partîyanê sîyasîyan û sazgeyanê sîvîlan zî est ê, beşdarê rayîrşîyayîşî bîyî.
Platformê Sazgehanê Demokratîk hêrişanê vera Rojava ser o qezaya Dêrikî ya Mardînî de rayîrşîyayîşêk organîze kerd. Parlemanterê DEM Partî, hemşaredarî, endam û îdarekarê partîyanê sîyasîyan û sazgehê sîvîlî beşdarê rayîrşîyayîşî bîyê.
Badê ke girse resa Qada Azadîye, parlemanterê DEM Partî yê Mardînî George Aslan û Salîha Aydenîz qisey kerd.
‘Şarê kurdî her çar parçeyan de payan ser o yo’
George Aslanî vat ke her çar parçeyanê Kurdîstanî, Tirkîya û dinya de şarê kurdî vera hêrişanê ke Rojawanî ser yenê kerdene, payan ser o yo û vat ke seserra 21. de reyna şarê kurdî rê xîyanet ame kerdene. Aslanî bale ante vengdayîşê Rayberê Şarê Kurdî Abdullah Ocalanî yê 27ê şubate ser o û vat: “Ma hetgirê haştîye yê û haştîye wazenê. Şarê kurdî vernîya emperyalîzmî de sereyê xo nêronano.”
‘Kobanê nêkewte, nêkewena’
Salîha Aydenîze bi munasebetê serrgêra xelaskerdişê Kobanê xoverdayîşê şarê Kobanê selam kerd û vat: “11 serran ra ver vatêne ‘Kobanê ha kewte ha kewena’. La Kobanê nêkewte û xelas bîye. Seserra 21. de 6 domanî serdî ra ganê xo ra bîyî. Ma naye qebul nêkenê. Înanê ke vera naye çimê xo girewtî û bêveng ê, hemkarê nê qirkerdişî yê.”
‘Ma bibê yew’
Aydenîze dîyar kerd ke şarê kurdî her çar parçeyanê dinya de bîyo yew û vat: “Ewro heme kurdî bîyî yew. Hişê înan Kobanê û Rojawanî de yo. Ma do yewbîyayîşê xo xurt bikerê. Ma Vakur, Başûr, Rojhelat û Rojawanê Kurdîstanî de bibê yew. Lazim o ke ma nê xoverdayîşê xo gird bikerê. Wa bizanê ke şarê kurdî bi hezar serran o nê erdan de ciwîyeno û do biciwîyo zî.”
