Seba Sakîne Cansiz Dêrsim de programê yadkerdişî ame viraştiş. Verfeka Meclîsê Cinîyan a DBP’î Berîvan Bahçecî yadkerdiş de wina va: “Ma do têkoşînê Sakîne Cansize her ca de bidomnê.”
Awankerdoxa PKK’î Sakîne Cansiz (Sara), Endama Hereketa Ciwananê Kurd Leyla Şaylemez (Ronahî) û Rayedara Kongreya Neteweyî ya Kurdistanî (KNK) ya Parîsî Fîdan Dogan (Rojbîn), 9ê Çeleyê serra 2013î de paytexta Parîsê Fransa de ameyê qetilkerdiş. Sakîne Cansiz, 12. serrgêra qetilkerdişê xo de awanîya Rêxistinê DEM Partîya Dêrsimî de ama yadkerdiş.
Verfeka Meclîsê Cinîyan a DBP’î Berîvan Bahçecî, wekîlanê DEM Partîya Ayten Kordu û Gulcan Kaçmaz Sayyîgît, temsîlkarê sîyasî û sazîyan beşdarê vîrardişî bîyê. Vîrardişî de wêneyanê cinî yê ameyê qetilkerdişî pêşkêş kerdê û sînevîzyon ame nîşandayiş.
‘Cuya mi, her tim şer bî’
Wekîla Dêrsimî Ayten Kordu vîrardişî de va ke Abdullah Ocalan seba na wina tesbît kerd; no Qirkerdişê Dêrsimî yê Diyine yo û wina va: “Têkoşînê azadîye yê embaza Sakîne wayîrê ca û hewldanêka zaf muhîm o. Embaza Sakîna resayişê nê têkoşînî de zaf ked daya û vate; cuya mi, her tim şer bî. Heme canê xo da û têkoşînê azadîye yê cinîyê kurd de wayîrê cayêkî muhîm o.”
Têkoşînê a ti rayî bi peynî nêbeno
Wekîla Wanî Gulcan Kaçmaz Sayyîgît zî ard ziwan ke têkoşînê cinîyan bi vatişan nîno ravekerdiş, bi hedefgirewtişê cinîyê kurd ê merkezê Parîsî konseptêko newe kewto merîyetî û wina domna: “Verba cinîyê kurd de şerêko xususî yeno kerdiş. Cinîyê kurd bi felsefeya cinî, cuye, azadî modelêk awan kerd û ma do têkoşînê xo bidomnê.”
Ma beyraqê embazanê xo, qatî erd de veranêdanê
Verfeka Meclîsê Cinîyan a DBP’î Berîvan Bahçecî dîyar kerd ke têkoşînê cinîye her ca de domyeno û wina dewam kerd: “Aqilê dewlete wazeno pêşengîya cinîyan her ca de çin biko. Nêwazeno cinî xo bi rêxistin bikê. Qirkerdişê embazanê ma yê cinî Parîs de, merkezê Ewropa de verdewamîya nê zîhnîyetî yo. Eke ma behsê têkoşînê cinîyan kenê û vanê; cinî, cuye, azadî bi saya keda înan o.”
Dima zî şîyê ser goristanê Sakîne Cansize.
