Verê roniştişê dewaya bobelatê hezazî yo ke Îlîça Erzinganî de 9 karkeran cuya xo vîndî kerde, rayîrşîyayîşê “Seba Îlîçî Edalet” ame kerdene. Qiseykerdişan de ke rayîrşîyayîşî de ameyî kerdene, ame vatene ke berpirsîyarê raştikêne wa bêro muhakemekerdene û cezakerdene.
Roniştişê 5. yê dewaya hezazî ke Madenê Zêrrînî yê Çoplerî yê qezaya Îlîça Erzinganî de 13ê sibata 2024î de bi û 9 karkeran cuya xo vîndî kerde, ewro Erzingan de yeno vînaye.
Verê roniştişî keyeyê ke merdimê xo nê bobelatî de vîndî kerdê saete 08:00î de Meydanê Çarrayî yê Erzinganî de ameyê pêser û ver bi edlîyeya Erzinganî rayra şîyê. Rayîrşîyayîşî de sloganê “Heq, huqûq, edalet”, “Îlîçî xo vîra meke, meverde ke bêro vîrrakerdene” û “Seba Îlîçî edalet” ameyê eştene. Parlamentera DEM Partî Ayten Kordu, Parlamenterê CHP’yî Orhan Saribal û Mustafa Sarigul, Parlamentera EMEP’î Sevda Karaca Demîr, temsîlkarê partîyanê sîyasî û xeylê kesî beşdarê eşkerayî bîyê.
‘Wa destê xo ronê vicdananê xo ser û qerar bidê’
Pîyê karker Ugur Yildizî ke bobelatî de cuya xo vîndî kerdbî Alî Ekber Yildizî verê edlîye de qisey kerd û vat: “Ez vengdana heyetê mehkema; wa destê xo ronê vicdanê xo ser o û qerar bidê. Wa nêşêrê TBMM de Suleyman Karamanî reyde fotograf nêgîrê, wa hetê ma de bê. Ez vengdana Wezîrê Edaletî zî. Vanê, ‘Tirkîya de huqûq est o, edalet est a’, ez vana Tirkîya de ne huqûq est o ne zî edalet.”
‘Her roniştişî de bi xemgînî, dej û hêrsî ma tîya de yenê pêser’
Temsîlkarê DÎSK’î yê Erzinganî vat: “Ma her roniştişî de bi xemgînîyêka girse, dej û hêrsî tîya de yenê pêser. Sere de keyeyê Ugur Yildizî, ma bi heme keyeyanê ke merdimê xo na bobelate de vîndî kerdê, înan reyde tîya de yê. Tirkîya de çîyê ke kêmî yê herinda ke bêrê temamkerdene, tim zêdêr benê û hîna zî xirabêr benê.”
Qiseykerdişî bi sloganan ameyê qedînayene û keye û kes û sazgehî ke paştî daye keyeyan waşt ke prosesê mehkema bi hewayêko tesîrdar bêra kerdene û kerdoxê raştîkênî bêrê cezakerdene.
