Dewaya Narîn Guran ke aşma tebaxe de vindî bîbî û badê 19 rojan meyît aye ameybî dîyene, qerar vejîya. Dadgehe de heme detayî bîyî magazîn û tîyatro, la persî bêcewab mendî.
Dewaya ke 6 rojî ramit û 37 şahidî, 4 verguman û bi desan avûkatan ameye goşdarîkerdene, Dadgeha Cezaya Girane ya 8. ya Amedî qerarê xo da. Hîrê gumanbaranê keyeyê Guran rê “hepso giran ê ebedî”, vergumano bîn Newzat Baxtîyarî rê zî 4 serrî û 6 aşmî cezaya hepsî ameye dayene.
Dosya de îxmalê cidî est bî û sîyasetkarî zî tede est bî, medyaya sosyale ser o îdrakê cidî virazîyayî û hemê persî bêcewab mendî. Cezayî seba ke raştî vejîyê meydan, bes nêbî û qiseykerdişê cinsîyetperestî yê ke dadgeh de ameyî vatene, fehmê pederşahî hîna kerd eşkera.
‘Dewa û muhakeme bî show’
Medyaya sosyale ra tepîya dosya bî magazîn. Masumîyetê her kesê ke nameyê ci vîyart binpay bî. Cuya cinîyan ameye perskerdiş. Sey nimûne, porê maya Narîne Yuksel Guran ra heta goşareyê aye bîyî mewzu û zaf detayê bînî ke faydeyê înan çin bî, vejîyayî meydan.
‘Medya û sîyasetkaran zerar da’
ATK’yî ra 98 nimûneyê DNA’yî ameyî girewtene la seba ke meyîtê aye 19 rojî awe de mendo, raporê otopsî de delîlêk nêame dîyayene. Narîn vindî bîyayene ra heta peynî îxmalê pîlî bîy û delîlî vîndî bîy. Dosya de tena Newzat Baxtîyarî qisey kerd û va Narîne keyeyê ci de ameya kiştene.
Vatişê Garîp Ensarîogluyî gumanî kerdî vêşî
Parlamenterê AKP’yî yê Amedî Garîp Ensarîogluyî bernameyê TV de va: “No keye embazê ma yo 40 serrî yo. Çîyê ke ma nêşênê vajê est ê.” Nê qiseykerdişî ra tepîya dosya şî hetêko sîyasî. Medya zî qedexeyê weşanî ra tepîya îfadeyî weşanayî û her verguman sey faîl ame mojnayene, îdrakê xeletî virazîyayî.
‘Qerarî şar qayîl nêkerd’
Dadgehe dat Salîm, bira Enes û maye Yuksel Guran rê ‘hepso giran ê ebedî’ û Newzat Baxtîyarî rê seba “vîndîkerdiş û nimitişê delîlan” 4 serrî û 6 aşmî cezaya hepsî daye. Huqûqnasan qerarî rê reaksîyon da û va ke Newzat Baxtîyar tena vîndîkerdiş û nimitişê delîlan de ney, kiştişî de zî şirîk o. Cezayan ra dima zî persê serekeyî bêcewab mendî û nêzanîya ke kiştişê Narîne çira û kamî kerdo.
Çime: JINHA
