MSD hewteyêk o ke xebatanê xo yê Îngilîstan û welatanê Ewropa de domneno. Hemserekê Ofîsê Têkilîyanê Pêroyîyan ê MSD’yî Hesen Muhemed Elî ard ziwan ke ê seba ameyoxê Surîye û hêrişanê verba Vakur û Rojhelatê Surîye qisey kenê û vat: “Têhetameyîşî zafane pozîtîf ravêrenê û verba Tirkîya nêrazîbîyayîş est o.”
Heyetê MSD’yî û Rayberîya Xoserî hefteyek o ke welatanê Ewropa de xebatanê dîplomasîye virazenê. 15ê çeleyî de Heyetê MSD û Rayberîya Xoserî paytextê Îngilîstanî Londra de hukmat, parlamento û rêxistinanê komelkîyan reyde têhetameyîşê dîplomatîkî pêardê. Heyeto ke Berpirsa Karê Teberî ya MSD’yî Îlham Ehmed û Hemserekê Ofîsê Têkilîyanê Pêroyîyan ê MSD’yî Hesen Muhemed Elî û endamê dîplomasîye ra yena pê, bi parlamenteran, sîyasetmedaran, rewşenbîran û temsîkaranê dezgeyanê komelkîyan reyde têhetameyîşanê xo dewam kenê.
Heyetê MSD’yî û Rayberîya Xoserî, Londra de tewrê panel û çalakîyan bîyê ke hetê Kurdish Progress, Grûba Kurdan a Partîya Karkeran û Temsîkarê MSD’yî yê Îngilistanî ra ameyê viraştene. Parlementoyê Londra de yew panel amede kerdene. Reyna bi munasebetê serrgêra rizgarkerdişê Kobanî de yew kombîyayîş pêard. Hetêk ra zî bi rayedaranê Hukmatê Partîya Karkeran, sendîka, dezgeyê komelkî û Hereketê Kurdistanî reyde kom bîyê. Heyet reyna bi Partîya Karkeran û parlamenteranê Partîya Muhafezekaran reyde zî têhetameyîşî kerdî. Parlamenterê DUB’î Sammy Wilsonî reyde zî yew têhetameyîş kerd.
Hesen Muhemed Elî qiseykerdişê xo doman û wina vat: “Amanca nê têhetameyîşan bi taybetî hêrişê dewleta tirke yê vera Rojawanî bîyê. Bi taybetî ma bale ant hêrişanê Awbendê Tişrînî ser o. Nê hêrişî do bobelatêko gird û tehlukeyêka pîle bîyarê. Ma waşt ke vera nê hêrişanê Tirkîya hesasîyetêk bêro mojnayene.”
Hesen Muhemed Elî va ke HTŞ’yî seba elewî û cinîyan tehluke yo û wina îfade kerd ke praktîkê înan xirab ê. Ey va “Kurdî û pêroyê Vakur û Rojhelatê Surîye, seba ameyoxê Surîye hêzê dîyarker û balans ê. Coka ma waşt ke zextêk Tirkîya ser o bêro viraştene ke nê hêrişanê xo yê vera kurdan vindarna.
Hesen Muhemed Elî tewr peyen derheqê dîplomasîya zereyî de nê çîyî vatî: “Nê wextanê tarîxîyan de eke kurdî çend zaf nêzdîyê yewbînan bibê û dîyalogo zereyî aver berê hende baş beno. Dişmenê kurdan wazenê ke mabênê kurdan de nakokî vêşî bibê. Ma zî vera naye senî bieşkê nakokîyê mabênê xo kêmî bikê û dostanîya xo zêde bikê do hêza ma biba xurt. Ganî nê têhetameyîşî dewam bikê. Rojawanî de zî ganî ENKS û partîyê bînî reyde têhetameyîşî bibê. Ganî hemparîyêk bêro kerdene. Ganî şarê kurdî bibo yew veng. Wexto ke şîyê Şamî ganî bi yew veng û qerarêk şêrê Şamî. Na mesela ser o do bi hetan reyde dîyalog aver şêro!”
