Doktoranê Sirri Sureyya Onderî ard ziwan ke hetê qelbî ra rewşa Onderî de başbîyayîşêk est a û vat: “Hetê norolojîkî ra dîyarbîyayîşêk est o. Rewşa nêweşê ma asta tehlukeya girdî de ya. La prosesê nêweşê ma seke ma wazenê dewam keno.”
Endamê Heyetê Îmraliyî yê DEM Partî û Parlamenterê DEM Partî Sirri Sureyya Onder 6 rojî yo Nêweşxaneyê Florence Nightingale yê Stenbolî de odeya pawitişê awarteyî de yeno tedawîkerdene. Nêweşxaneyê Florence Nightingale derheqê rewşa Sirri Sureyya Onderî de vernîya nêweşxaneyî de eşkerayî daye. Eşkerayî de Rektora Berpirsîyara Prosesanê Tibî yê Nêweşxaneyê Florence Nightingaleyî Prof. Dr. Çavlan Çiftçî û doktorê Sirri Sureyya Onderî Prof. Dr. Ertan Sagbaş derheqê rewşa Onderî de agahî dayî.
‘Rewşa nêweşê ma asta tehlukeya girdî de ya’
Prof. Dr. Çavlan Çîftçî destpêkî de qisey kerd û ard ziwan ke êdî hetê rastî ra zî qelbê Sirri Sureyya Onderî dano piro û wina vat: “Tansîyonê nêweşê ma nika baş o. Roja şemî ma sîneyê ey akerd. Hetê rastî yê qelbî ey dano piro la asta ke ma wazenê a aste de nîyo. Nê semedî ra zî hema zî girêdayeyê cîhazî yo. Qesawetê doktoran a norolojîk dewam keno. Rewşa bi tehluke dewam kena. Hetê qelbî ra başbîyayîşêk est o. Tedawî do demêko derg bikera. Her roje do eşkerayî bêra dayene. Cayê emelîyatî abî, gonî yan zî enfeksîyon çin ê. Ma nêeşkenê demêko dîya bidê. Nêweşê ma hema zî nêmaeyo xo ser. Seba ke xo ser o nîyo, gumanê norolojîkî est ê. Nê semedî ra nêweşê ma asta tehlukeya girdî de yo.”
‘Hetê qelbî ra ver bi başîye şono’
Doktorê Sirri Sureyya Onderî Prof. Dr. Ertan Sagbaş zî dîyar kerd ke pirodayîşê qelbî yê hetê rastî agahîyêka baş a la hema zî ê do bipawê û testê înan do dewam bikerê û vat: “Rewşa organanê zereyî, cîgere û velkan baş a. Proses seke ma wazenê dewam keno. No zî mojneno ke ma rayîrêko rast de yê. Ma nêeşkenê çîyêko şênber vajî. Ma wazenê mezgî ra zî biewnê la ma do key bikerê dîyar nîyo.”
