Serekê DTSO’yî Mehmet Kaya da zanayene ke înan agahî girewta ke Berê Sînorî ê Nisêbînî do 31ê adare de newe ra bêro akerdene.
Kombîyayîşê Odeyê Bazirganî û Endustrî yê Amedî (DTSO) yê aşma sibate bi tewrbîyayîşê serek û endamanê Komîteyanê Meslekî salona kombîyayîşî de virazîya. Sereka Meclisî Nevîn Îl kombîyayîş rayra berd. Serekê Komîteya Rayberîye yê DTSO’yî Mehmet Kaya kombîyayîş de qisey kerd û ard ziwan ke ganî şaristanê herême sey Herêma Endustrî yê Mega bêro îlankerdene.
Mehmet Kaya bale ante serê dorpêçê Kobanî ke dewam keno û wina vat: “Seke şima zanê ma bi nameyê Platformê Paştîdayene û Pawitena Şaristanî xebatêke da dest pêkerdene. Taybetî bi pêşengîya serekîya odeyê ma û paştîdayena ke girde yê endamanê meclisî û endamanê komîteya meslekî, hetkarîya ke zaf muhîme ameya komkerdene. Helbet amancê ma yê sereke no bî ke ma na hetkarî bilez û wextêko kilmde Berê Murşîtpinarî ser biresnê Kobanî. La waştenê ma bi rayedarê AFAD’yî û di temsîlkarê ma berêke bîn ra resayê kobanî. Hetkarîya merdimî resa Kobanî. Nika ma seba kampanyayeke diyina her tim eşkerayî û agahîyan vila kenê. Hetkarî yena komkerdene û pêvînayîşî ma dewam kenê. Ma do malzemeyê hetkarîya merdimî yê bi hewayî ameyê komkerdene di hevalanê ma reyde ya Berê Sînorî yê Murşîtpinarî ya zî Berê Sînorî yê Nisêbînî ra biresnê Kobanî.”
Mehmet Kaya dîyar kerd ke înan agahî girewta ke Berê Sînorî yê Nisêbînî ke demêko dergo girewteyo do 31ê adare de newe ra bêro akerdene û dîyar kerd ke bi akerdişê Berê Sînorî yê Nisêbînî ra do her di hetkarî zî bi rehetî berê erşawitene û bazirganîya Sûrîya reyde newe ra dest pê bikero.
‘Di şaristanî do endustrîya Farqînî ra îstîfade bikerê’
Mehmet Kaya vîr vist ke seba awankerdişê Herêma Endustrî yê Organîze Îhtîsas Endustrîya werdî û Kulturî, Emlakê Mîllî transferê tapûyî ameyo kerdene û ard ziwan ke do Herêma Endustrî yê Organîzeyî bibo herêmeke ke Amed û Êlih tira îstîfade bivînê.
