Serekê Baroya Amedî Abdulkadîr Gulek dîyar kerd ke nêzdîbîyayîşê temsîlkarê DYA’î seba ameyoxê herême telûke yo û wina va: “No nêzdîbîyayîş do herême hîna zafêr bikero mîyanê kaosêko xorîn. Wa her kes rêzê waştişê şarê kurdî yê rewa rê bigê.”
Avûkatanê Baroya Amedî, Temsîlkarê Taybetî yê Amerîka yê Berpirsîyarê Kar û Baranê Sûrîye Thomas Barrack rê mektubêk erşawit. Mektubî de dayî zanayene ke 50 serranê peyênan de, zêdeyî 500 hezar kurd; Îran, Iraq, Tirkîya û Sûrîye de ameyî kiştiş, kurdan seba cuye, azadî û seyyewbînanîyî bedelê bêhempayî dayî.
Baroyî dewamê mektubyî de şerê vera DAIŞ’î zî bi vîr vist û va: “Kurdan ne tena seba azadîya xo la eynî wext de seba merdimeyeyîye zî bedel dayî. Nêzdîbîyayîşê ‘Ma qet çîyêk deynê înan nîyî’ no vatiş, xeletîyêk exlaqî û stratejîk a cidî ya. Labelê qiseykerdişê Thomas Barrackî ‘Yew netewe, yew dewlete, yew artêş, yew Sûrîye’ ke waştişanê kurdanê Sûrîye û Iraqî paşgoş keno, ne tena sîya xo dana serê nê têkoşînî yê bi rûmet. Eynî wext de prensîbê azadî û heqê çarenuşteyî yê şaran ke felsefeya awankerdoxî ya Dewletanê Yeybîyayeyan ê Amerîka yê zî vînî keno.”
Baroyî dewamê mektubî de ard ziwan ke no mektub vengê hêrs û hêvîya şarî yo û wina zêde kerd: “Belkî şima qet çîyêk deynê şarê Kurdî nêbî, labelê heme şarê cîhanî, bi taybetî şarê Dewletanê Yewbîyayeyan ê Amerîka, deynê kurdan ê. Bi vîrameyîşê ma ke mîrasê azadî yê Jeffersonî, têkoşînê şarê kurdî ya seba azadî û seyyewbînîye de rolêk kay keno. Ma hêvî kenî ke şima qiseykerdişanê xo yê verênan de goş bidî nê vengî. Çîke senaryoyê ke şima hewl danî binusnî, bêyî ke tarîxê nê erdnîgarî fam bikerî, ne goreyê raştîya kurdan o ne zî yê şaranê bînan ê bindestan o. Edalet tena bi goşdayîşê vengê şarî mumkîn o.”
Serekê Baroya Amedî Abdûlkadîr Guleç derheqê babetî de ajansê ma rê qisey kerd û wina va: “Nê nêzdîkerdişê nûnerê DYA’î telûkeyê ey dano ke herême bikero mîyanê kaosêko xorîn.”
Serekê Baroya Amedî Abdulkadîr Guleç, bala xo ant hêrişê serê durzîyan û wina dewam kerd: “Na kome temsîlîyetê zîhnîyetêkî kenî ke koletîya kurd, elewî ereb, durzî û kêmîneteweyanê bînan hedef gêno û kesê ke înan reyde nê yenî pê bi hovîtî mîyan ra hewnenî. Eşkeno hêrişanê neweyan serê kurdan û komelanê bînan ê cîyayan Sûrîye de rewa bikero û teşwîq bikero. Rayîrê pêkewtişê neweyan akero. Na nêzdîbîyayîş xetereyê ey dano ke herême bikero mîyanê kaosêko xorîn. Waştişê kurdan yê seba statûyanê ‘Nêmerkezî’ yê sey federasyon û xoserîye ne îmtiyaz ya zî cîyakarî yê; verê cû, ê şertê tewr kêmîn ê seba awankerdîşê rêzikmektubêko demokratîk Sûrîye de yê. Paşgoşkerdişê nê waştişan, cayo aşîtî de pêkewtişî aver beno.”
Abdulkadîr Guleç tewr peynî da zanayene ke no nêzdîbîyayîş, hîşmendîya barbare xurt keno, helwêstek bêro mojnayene û rêzê waştişanê rewayan ê şarê kurdî û komelanê bînan ê Sûrîye rê bigîrî.
–
