Edene, Mêrsîn, Riha ve Dîlok de şayîyanê Newroze bi govende dest pêkerdî.
Edene de bi şîarê “Newroza Azadî û Demokrasî” pîrozkerdişê Newroze dest pêkerd. Seyhan de Tîyatroyî ser akerde yê Mîmar Sînanî de seba şayîya Newroze hemwelatî saetanê sodirî de herikîyayê ver bi qadî. Vera hewayê şilî zî bi kincanê neteweyî tewrê şayîya Newroze bîyê. Girse bi slogananê “Bijî Serok Apo” û Biciwiyo Newroz” reyde govende girewte.
Şayîye de Parlamentera DEM Partî û verfeka meclisê Cinîyan Halîde Turkoglu û Cagirê Hemserekê Pêroyî yê DEM Partî Mehmet Ruştu Tîryakî do qisey bikerê û hunermendê herêmî û Aram Serhad do sehne bigîrê.
DÎLOK
Qezaya Şehîdkamîl ê Dîlokî yê meydanê Îstasyonê de bi şîarê “Newroza Azadî û Yewîya Demokratîk” yeno pîrozkerdene. Kesê ke tewrê Şayîye bîyê bi kincanê neteweyî û fotograf û dovîzanê ke serê înan de Rayberê Şarê Kurdî Abdullah Ocalan azadîya fizikî wazenê berz kerdî.
Vera şilîya zafê zî cinî û ciwanî bi govende heyacanê Newroze pêro pîya ciwîyenê.
RIHA
Qezaya Halîlîyê yê Riha, vernîya Parka Novada de seba şayîya Newroze bi hezaran kesî herikîyayê qadê Newroze. Vera şilîye zî bi kincanê xo yê neteweyî û flamayanê kesk û sûr û zerd kewtişê qadê Newroze dest pêkerd.
Meydanê Newroze de tilîlî û sloganan reyde govendî ameyê girewtene
MÊRSÎN
Mêrsîn de şayîya Newroze dest pêkerd. Qezaya Akdenîz Meydanê Tirmil de saetanê şodirî ra hemwelatî herikîyayê warê Newroze. Vera şilî zî bi kincanê neteweyî û renganê kesk û sûr û zerdî 7 ra heta 70î serre sloganan reyde govende girewte. Badê deqîqeyêk rêzgirewtişî Komîteya Amadekarîya Newrozî û Parlamentera DEM Partî Gulîstan Kiliç Koçyîgît do qisey bikerê.
Badê wekerdişê adirê Newroze hunermende Ruken Yilmaz do sehne bigîro.
