Nuştoxanê ke behsê vîrardişanê xo yê bi şaîr Ehmed Huseynî reyde kerd, dîyar kerd ke Ehmed Huseynî “Şêxê şîîra moderne ya Kurdî bî, têkoşer û xebatkar bî.”
Şaîro Kurd Ehmed Huseynî ke demêko derg semedê nêweşîya qanserî ameyêne dermankerdene 10ê adare de Swêd de cuya xo ra bî. Wefatê şaîr, nuştox û roşnvîro kurd ê namdar Ehmed Huseynî, warê edebîyat û kulturê kurdî de dejêko girs viraşt. Ehmed Huseynî yê ke cuya xo rayîrê ziwan û edebîyatê kurdî feda kerdbî û sirgun de şî heqîya xo, yeno vîrardene. PEN’a Kurd, Komeleya Wêjekaranê Kurd, YEWKURD, MED-DER, Enstîtuya Kurdî yê Amedî, Ma Muzîk, Wêjegeh bi munasebetê wefatê şaîr Ehmed Huseynî banê Komeleya Wêjekaranê Kurd de vizêrî tezayî rona û do ewro bi qedîyo. Endamê Enstîtuya Kurdî yê Amedî Servet Denîz, Nuştoxe Mîne Acer û Endamê YEWKURDî Jêhat Rojhilat derheqê şexsîyet û keda Ehmed Huseynî de hîs û vîrardişê xo ajansê ma rê pare kerdî.
‘Tena şêxê şîîra nê bî, şexê helwestî zî bî’
Endamê Enstîtuya Kurdî yê Amedî Servet Denîzî, qalê girêdanê Ehmed Huseynî yê Vakurê Kurdîstanî rê kerd û xetirayêk ey bi dej yê serê sînorî pare kerde. Servet Denîz dîyar kerd verê ke sînorî bêrê girewtene, Ehmed Huseynî her tim ameyene Vakur, tewrê xebatan bîne û programê televîzyonî hedre kerdene. Servet Denîz da zanayene ke Ehmed Huseynî rayêke hewl dano ke reyna sînor derbas bikero, la rastê îşkenceyêk giranî yeno û wina vat: “Prosesêko endî şer dest pêkerdbî, reyna hewl dano ke sînor derbas bikero û bêro Vakur. La serê sînorî de amebî girewtene û îşkenceyêko giran ro ey amebî kerdene. Badê ra îmkanê ey ameyîşê Vakurî nêvirazîya.
‘Do vîrê neslanê ameyoxî de bimano’
Servet Denîzî bale ante serê vindertişê Ehnmed Huseynî yê neteweyî û wina vat: “Her kes nika serweşîye wazeno û ey sey ‘şexê şîîra’ biname kenê. La bi rastî o tena şêxê şîîra nêbî, eynî wextî de şexê helwestan zî bî. Xeylê şaîrî û afirînerî estê, la her kes wayîrê helwestî nîyo û hende zerrî ra girêdayê şar û welatê xo nîyo. O bi nê hewayî do vîrê neslanê ameyoxî de bimano.”
‘Seba ciwanan pêşeng û rayber bî’
Nuştoxe û mamostaya kurdkî Mîne Acer qalê tesîrê Ehmed Huseynî yê serê ciwanan û edebîyatê kurdkî kerd. Mîne Acer dîyar kerd ke sey cinîyêka ciwan û nuştoxe, Ehmed Huseynî vînayîşê aye sero tesîrêko girs kerdo û Ehmed Huseynî warê nuştoxî de rayîr mojnayo aye. Mîne Acer vîrardişê xo yê bi Ehmed ra wina ard ziwan: “Ma fuara kitaban de yewbînî vîna. Mi kitabê ey girewt û ma sohbet kerd. Mi behsê nuşteyanê xo kerd, ey zî feyz da mi. Şîretî ro mi kerdî ke senî ez raya edebîyatê kurdî de şêrî. Kesêko zaf têkoşer û xebatkar bî, mimkun nêbî ke merdim binê tesîrê ey de nêmano.”
‘Mîrê şîîrê modernî bî’
Nameyê YEWKURDî ser o zî Jêhat Rojhelat qisey kerd û xemgînîya xo yê semedê wefatê Ehmed Huseynî yê sirgunî ard ziwan. Jêhat Rojhilat vîr vist ke înan verê Sumer Parka Amedî de bi nameyê “Festîvalê Rûmetî” programêke viraştbî û Ehmed Huseynî tewrê ci bîbî. Jêhat Rojhilat o sey bingeyê edebîyatê modernî yê kurdkî pênase kerd û vat: Taybetîya ey no bî ke kesêko resmî nêbî; mîyanê şarî de bi ciwanan ra ciwan bî, bi kokiman ra kokim bî. Ey tena seba nuştoxî nênuşt, dej û derdê şarê xo şîîrê xo de ca dayene ci. Mi zaf reyan tira vatêne ‘mîrê şîîre’ yan zî ‘şêxê şîîrê modernî.”
