Serekê Elewîyan, grûba Meclîse ya DEM Partî zîyaret kerd. Zîyaretî de derheqê Elewîyan ke Sûrîye de binî tehlukeya qirkerdişî de yê ame qiseykerdene.
Sûrîye de dima ke rêxistinê Heyet Tahrîr eş-Şam (HTŞ) rejîmê Esadî orte ra wedarna, Elewîyê ucayî hîna zaf biqilqal bîyê.
Nufusê Elewîyan Sûrîye de hema hema se ra 13 bi û zafaneyê ci qeraxê welatî de cuya xo domnayêne. Kewtişê Şamî ra pey HTŞ sere de Lazkîye dima ra hîna zaf bajaran de cayê cuye yê Elewîyan xesp kerd.
Hêrişanê verba cayanê bawerîye yê Elewîyan benê sebebê reaksîyonî.
Kiştişê 5 sîvîlan û veşnayîşê tirba Huseyîn bîn Hamdan el Hasîbîyî ra pey herême de ters hîna zêde bi. Elewîyê Erebî Hûmûs, Hama, Tartûs û Lazkîye nê mergî protesto kerdê. La HTŞ bi çek hêrişê nê protestoyan kerd.
Serekê fikrî yê Elewîyanê Ereban, grûba Meclîse ya DEM Partî zîyaret kerd û Hemserekê Tulay Hatîmogullari û Tûncer Bakirhanî reyde pêvînayêş kerd. Pêvînayîşî de derheqê Elewîyanê Sûrîyeyijan de ke binî tehlukeyê de yê, ame qiseykerdene.
