Êlih, Cizîr û Gever de se hezar welatijî qadanê Newroze de kom bîyê û bi çoşêko pîl Newroze pîroz kenê.
Roşanê Newroze 14 merkezanê Vakûrê Kurdîstanî de bi sloganî “Raybero Azad Komelo Demokratîk” yeno pîrozkerdene. Se hezar welatijî taxan de kom bîyê û grûbe bi gûrbe bi slogan û govende vera xo daye qadanê Newroze. Êlih, Cizîr û Gever de bi coşêko pîl Newroze yena pîrozkerdene.
Êlih
Êlih de bi hezaran kesî tewrê hewayo serd zî bi sloganî “Bijî Serok Apo” ver bi qada Newroze herikîyenê. Êlih de pîrozbayîya Newroze bi sloganî “Raybero Azad Komelo Demokratîk” yena kerdene. Bi hezaran kesî ver bi qada Newroze ya taxa Pazaryerî herikîyenê. Tewrê şîlî û hewayo serd zî welatijan bi deyîranê Kurdkî demêko derg govenda Newroze girewte. Herikayîşê şarî yê taxanê Korik, Pazaryerî, Petrolkent, Îpragaz û Cûdî ver bi qade hema zî dewam keno. Zafaneyê welatijan cil û belgê Kurdkî xoradayê. Qade de flamayê kesk, sûr û zerî ameyê girewtene û xeylê reyan sloganî “Bijî Serok Apo” qade de gulbang dano.
Hemserekê DBP’yî yo Pêroyî Keskîn Bayindir, Cagirê Hemserekê DEM Partî yo Pêroyî Tayîp Temel û aktîvîsta Tevgerê Cinîyanê Azadan (TJA) Mekîye Ormanci do pîrozbayî de qisey bikerê.
Gever
Seba pîrozkerdişê Newroze qezaya Geverî de bi hezaran kesî herikîyenê qada pîrozbayî. Qezaya Geverî Colemêrgî de do Newroze bêra pîrozkerdene. Welatijê qezayî hêdî hêdî qada pîrozbayî pirr kenê. Xeylê cayanê şaristanî ra welatijan vera danê Stadyuma Ciloyî ke do Newroze tede bêra pîrozkerdene. Zafaneyê beşdaran cinî û ciwan ê. Welatijê ke bi cil û belganê xo yê Kurdkî tewrê pîrozbayî bîyê, govende gênê û qade de sloganî “Bijî Serok Apo” gulbang dano.
Cizîr
Qezaya Cizîr de bi hezaran kesî seba wekerdişê adirê Newroze herikîyenê qada pîrozbayî. Qezaya Cizîrî ya Şirnexî Roşanê Newroze bi sloganî “Raybero Azad Komelo Demokratîk” yeno pîrozkerdene. Pîrozbayî qada Şaristanî ya taxa Konakî yeno kerdene. Bi hezaran kesî saetanê rew yê serê sibayî de vera xo daye qada Newroze. Welatijê ke cil û belgê Kurdkî xoradayê, zaf reyan sloganî “Bijî Serok Apo” berz kenê. Ameyîşê şarî yê qada pîrozbayî dewam keno û coşê qade her ke şono hîna zaf beno. Hemşaredara Wanî ya Şaristanê Girdî Neslîhan Şedal û Parlamentera DEM Partî ya Şirnexî Newroz Uysal Aslan do pîrozbayî de qisey bikerê. Dima do deyîrbaz Rojda, Kasim Taşdogan û Hozan Şervan sehne bigîrê.
