Aktîvîsta TJA’yî Rûken Zeryam Işik Yildiz va, “Ma do 8ê Adare de Êlih de seba azadîya Rayberê Şarê Kurd Abdullah Ocalanî biqîrê ke mîmarê felsefa ‘Jin, jîyan, azadî’ yo.
Êlih de 8ê Adare de bi pêşengîya Tevgera Jinê Azad (TJA) û bi sloganê “Cinî vera qirkerdişî serewedarenê, ver bi azadîye rayîr ra şonê” do mîtîngêk bêro organîzekerdene. Mîtîng 8ê Adare de saete 11:00î de Parkê 8ê Adare de beno. Mîtîng de do Parlamentera Partîya Têduştî û Demokrasî ya Şaran (DEM Partî) Gulistan Kiliç Koçyîgît qisey bikera û hunermend Xecê zî sahne bigîra.
Aktîvîsta TJA’yî Rûken Zeryam Işik Yildiz avzelîya 8ê Adare ya emserî ser o qisey kerd û heme cinîyan dawetê mîtîngî kerd.
‘Ma hêzo teorîk û pratîkî ra bawer kenê’
Ruken Zeryam Işik Yildiz derheqê prosesê de ke bi vengdayîşê Rayberê Şarê Kurdî Abdullah Ocalanî 27ê
sibate de destpêkerdo, qisey kerd û muhîmîya gamêka Ocalanî eşt a nîşan da û va: “Na game seba tevgerê cinîyan ê kurdan zaf muhîm û bi mana ya. Bawerîya ma bi hêzê ey ê teorîk û pratîkî temam a. Ma piştî danê no proseso ke dest pêkerdo. Ma sey aktîvîstê TJA’yî do merkezê nê prosesî de bê.”
Işik Yildiz dîyar kerd ke ê 8ê Adara seserre ciwîyenê û wina dewam kerd: “Cinîya rojnamegere hemraya ma Cîhan Bîlgîn ameye kiştene. Ez wazena vaja ke 8ê Adara emserî seba aye beno. Nameyê aye ser o merkezê destpêk welatê aye Midyad de ame kerdiş. Hem proses hem zî qirkerdişê cinîyan ke ameyo astêka berze û hem zî têkoşînê cinîyan ke hîna aver şîyo, seba naye ma do emser 8ê Adare hîna manadar pêşwazî bikê.”
Roja serewedariştî
Işik Yildiz ard ziwan ke 8ê Adare roja serewedaritiş û xoverdayîşî ya û va: “Mîyanê ahengê ke yenê kerdene de, serewedaritişêk, qîrayîşêk û vatişê waştişanê ma est o. Ganî bêro vatene ke ma ke kewtê seserra 21. qirkerdişê cinîyan zî hîna zaf bîyê. Ez wazena vaja ke ma sey tevgerê cinîyan ê kurdan 8ê Adara emserrî sey rojêka rêze ra nêvînenê. Na çarçewa de hepisxaneyan rê 129 hebî kartî ameyê erşawitene. Sebebê erşawitişê kartan no yo ke ma veng dayo 129 cinîyan ke xo veşnayo û 8ê Adare ardo heta nê rojan. Ma taxan de bi kincanê herêmkîyam têhetameyîşanê renginan kenê. Ney reyde ma pîya kombîyayîşan kenê. Eynî wextî de ma polîtîkayanê şerê taybet yê vera ciwanan de hacetê ke yenê şuxilnayene, xover danê. Ma nê xoverdayîşî şexsê Rojvelat Kizmaz de gird kenê. Peynîya nê xebatan de do mîtîngêk bibo. Mîtîngî de ma cinîyan bi vengêko bihêz dawet kenê ke bi rengê xo, bi ziwanê xo, bi tilîlî, bi slogan û bi waştişanê xo qadan pirr bikê.”
Waştişê azadîye
Işik Yildiz ke dîyar kerd ke vera cinîyan hêrişêko zafhetin est o, qiseyê xo wina qedênayî: “Vera nê hêrişî zafhetin zî xebatêka zafhetine lazim a. Demo ke ma xebatanê 8ê Adare kenê, eynî wextî de ma xebatanê rêxistine zî kenê. Ma do pîya waştişê azadîya Rayberê Şarê Kurd Rêzdar Abdullah Ocalanî bikerê ke mîmarê felsefa ‘Jin, jîyan, azadî’ yo. Mesajê Rêzdar Ocalanî seba cinîyan bî. Ez wazena vaja ke ma bi heme kelecan û bawerîya xo vengdayîşê ey silam kenê. Seke Rêzdar Abdullah Ocalanî zî va, pêşengê xoverdayîşê demokrasî do cinî bibê.”
