Saetanê serê sibayî de rayîrê Elkê û Şirnexî ser o hezaz bi û rayîr ame girewtene. Welatijan dîyar kerd ke seba ke rayîr ame girewtene, ê mexdur bîyê û rayîr çar saetî ra pey ame akerdene.
Herêma Komate ya qezaya Elkê ya Şirnexî ke nêzdîyê dewa Bêrmanî ya qezaya Elkê yo, saetanê serê sibayî de seba ke hezaz bi rayîr ame girewtene. Rayîro ke Elkê ra şono Şirnex û Colemêrg bi saetan girewte mend û welatijî rayîr de mendê. Welatijê ke rayîr de mendê da zanayene ke seba ke rayîrî akerê ekîbanê Rayîrê Bejayî gêrayî la înan vato makîneyê kar ê ke eşkenê rayîrî akerê destê înan de nîyê. Welatijî ke ma bi telefonî înan reyde qisey kerd, dîyar kerd ke ekîbê Mudirîyetê Bejrayîrî makîneyêka karî şaristanokê Dêrahînî yê qezaya Qilebanî ra kîra kerda û arda.
Xeylê welatijî ke seba Nêweşxaneyê Dewlete yê Şirnexî randevû girewtbi yan zî karê înan est bi, mexdur bîyê. Welatijê seba ke rayîr girewte bi bêçare mendê ke uca ra agêrê û rayîrê şaristanokê Dêrahînî yê Qilebanî ra şîrê Şirnex. Welatijan îfade kerd ke Ekîbê Mudirîyetê Bejrayîrî bi makîneyanê ke kîra kerdê, saete derûdorê 11:00î de rayîrî akerdo.
Welatijan dîyar kerd ke hem mewsîmê zimistanî yan riyê hezazî ra yan zî riyê varayîşê vewre zafe ra no rayîr yeno girewtene û seba ke erey yeno akerdene, ê mexdur benê. Welatijan waşt ke seba ke no mexdurîyet nêbo, wa rayedarî tedbîran bigîrê û rewşanê winasînan de bilez mudaxele bikerê.
