Embaz û hemrayanê Sirri Sureyya Onderî îfade kerd ke ê do heta peynî têkoşînê ey rê dewam bikerê.
Hemserekê DEM Partî, wekîl û keyeyê Sirri Sureyya Onderî vizêrî ra nata Îstanbul de, Merkezê Kongre yê Cemal Reşît Reyî de serweşîye qebul kenê. Embaz û hemrayanê Onderî ajansê ANF’yî rê qisey kerd.
Hemvervatoxa HDK’yî Meral Daniş Beştaş vat: “Onder wexto ke şîyêne zî karêko pîl kerd. Her kes mergê ey ver kewt. Ey xo resnabi xeylê merdiman. Bi taybetî aşmanê peyênan de ey babeta aştî de zaf xîret kerd. Kombîyayîşê dormeyê ey mojneno ke Tirkîya aştî rê amade ya. No çîyêko erjîyaye û muhîm o. Ganî ma aştî bîyarê ca. Seba ma pêrûnan na mesuldarîyêka pîl a.”
Wekîlê Mûşî DEM yê Partî û Serekwekîlê Koma DEM Partî Sezaî Temellî: “Wextê cenaza de fekê her kesî de aştî est bî. Şar wayîrê vîrameyîş û têkoşînê Sirri Sureyya Onderî vejîya. Mîraso ke şaranê Tirkîya rê mendo têkoşînê aştî yo. Onderî her tim qala vengdayîşê Ocalanî kerdêne. Nika wezîfeyê ma yo ke ma nê vengdayîşî bîyarê ca. Ganî ma seba awankerdişê aştî, seba rêxistinkerdişê komelê demokratîkî û vurnayîşanê pîlan xîret bikerê.”
Wekîlê CHP’yî yê Amedî Sezgîn Tanrikulu: “Sirri aktorêko sîyasî yo muhîm bi. Kesanê ke o sey dişmenî dîyêne zî bi qiseyanê Sirriyî bawer kerdêne. Dostê ma wefat kerd. Wezîfeyê ma yo ke ma mîsyonê ey rê dewam bikerê û aştî bîyarê ca.”
Wekîlê Îstanbulî yê DEM Partî Cengîz Çîçekî vat: “Cewabo tewr manadar o ke ma bidê Onderî komelkîkerdişê aştî yo. Pîlkerdişê fikrê aştî û caardişê atmosferê aştî yo.”
Wekîla Mersînî ya DEM Partî Perîhan Koca vat: “Ma sutunêkê aştî vîndî kerd. Ma komelêko winayên ê ke bedêlê giranî dayê. Sirriyî barêko giran milê ma de verdaye.”
Wekîlê Mersînî yê DEM Partî Alî Bozanî vat: “Bi hezaran, bi des hezaran kesan pîya yew slogan vat: ‘Ma sozê aştî danê Sirriyî.’ Uca de tena kurdî ney her ca ra merdimî est bîyî. Embaz Sirriyî xeylê tabuyî rijnayî.”
Wekîla Rihayî ya DEM Partî Dîlan Kunt Ayhan vat: “Sirriyî peyê xo de mîrasêko pîl verda. Ganî no bêro pawitene. Na yewîye, na embazîye mîrasêk o. Ganî ma nê mîrasî pîlêr bikerê û ser bifînê. Yanî hêvîya aştî. Ganî ma mîrasê Sirriyî bîyarê ca.”
