Encamnameyê Konferansê Yewîya Neteweyî ya Cinîyanê Kurd ke bi pêşengîya Înîsîyatîfê Cinîyanê Kurd ê Ewropayî Holanda de ame viraştene, dîyar bi. Eşkerayî de ame vatene ke hedef û waştişê konferansî, awankerdişê yewîya neteweyî ya cinîyan o.
Bi pêşengîya Înîsîyatîfê Cinîyanê Kurd ê Ewropayî 13ê kanûne de Holanda de bi şîarê “Bi Yewîya Cinîyan ê Kurdan Ver Bi Kurdîstanê Azadî” Konferansa Yewîya Neteweyî ya Cinîyan ê Kurdan a 1. ameye viraştene û beyannameyê netîce dîyar bî. Beyaname de ame îfadekerdene ke semedê îşxalê Kurdîstanî 100 serranê peyênan de cinîyê kurdî mecbur mendî ke çar hetanê dinya ra koç bikerê û semedê nê koçî dej û zehmetîyê zaf girdî ciwîyayî.
Eşkerayîye de bale ame antene ser ke semedê talanbîyayîşê erd û welatê xo cinîyê kurdî bîyî penaber la seba Kurdîstanê azadî, seba kultur û nasnameyê kurdan qet têkoşînî ra fek nêverda. Eşkerayîye de bale ame antene ser ke seba ameyoxêko azad hem sey cinî hem zî sey kurd ganî cinîyê kurdî bingeyê yewîya neteweyî ser o hêzê xo bikerê yew û ame vatene ke hedef û waştişê konferanse, awankerdişê yewîya neteweyî ya cinîyan ê kurdan a Ewropa yo.
Beyannameyê netîceya Konferansa 1. ya Înîsîyatîfa Cinîyan ê Kurdan a Ewropa:
- Konferanse de qerar ameyo girewtene ke Yewîya Neteweyî ya Cinîyan ê Kurdan a Ewropa do nika ra pey sey platformêk xebatanê xo dewam bikero.
- Qerar ameyo girewtene ke seba ramitişê xebatanê platformî 21 kesan ra îdareyêk do bêro weçînayene.
- Cinîyê kurdî yê Ewropa vera her tewir hêrîşê ke cinî û nirxê neteweyî hedef gêno, hessas ê. Coka bingeyê yewîya neteweyî ser o do nîşandayîşî bêrê kerdene.
- Cinîyê kurdî yê Ewropa rîyê averşîyayîş, krîz û şeran ra ke Kurdîstan de yenê ciwîyayene, xo berpirsîyar vînenê û do seba haştîye pîya têkoşîn bikerê. Nê rayîrî de Ewropa de xebatê sîyasî, komelkî û dîplomatîkî do bêrê zêdekerdene.
- Cinî do prosesê neweyî yê çareserîya meseleya kurdan a Vakurê Kurdîstanî de aktîf piştgirî bidê; vera heme talukeyanê Rojawanî de do waştişêko neteweyî bêro nîşandayene; seba pawitişê statuyê Başûrî yê nikayênî do waştişêko hempar bêro nîşandayene; vera teda û zulmê dewleta Îranî Rojhilat de sewîyeya mîyanneteweyî de do têkoşîn hîna zaf bêro pêtkerdene.
- Ganî vera şîdetî têkoşîno hempar bêro ramitene û heqê cinîyan bêrê pawitene.
- Ganî vera şîdetê dewletanê îşxalkeran ke cinîyanê kurdan rê yenê kerdene, Ewropa de kesayetîya dezgehanê mîyanneteweyîyan de têkoşîno dîplomatîk û sîyasî bêro ramitene.
- Ganî seba pêtkerdişê têkilîyanê mabênê cinîyanê kultur, bawerî û neteweyanê cîya-cîyayan ê Ewropa de dîyalogê dostane û hevalane bêrê viraştene.
- Ganî rîyê zehmetî û probleman ra ke cinîyê dîyaspora ciwîyenê (asîmîlasyon, nîjadperestîye) de tepşêko hempar bêro girewtene.
- Ganî seba ke kurdkî, kulturê kurdan û bawerîya kurdan dewletanê Ewropa de bêro ramitiş û fermî nas bibo xebatê hemparî bêrê ramitene. Keyeyanê kurdan rê yeno vengdayene ke derheqê pawitişê ziwan û nasnameyî de berpirsîyarîyanê xo bîyarê ca.
- Ganî cinîyê kurdî yê ke teberê dewlete de ciwîyenê seba ekonomîya otonome projeyê hemparan virazê. Heto bîn ra ganî derheqê projeyê piştgirîye yê seba cinîyanê kurdan ke dewlete de ciwîyenê zî waştişêko pêt bêro nîşandayene.
- Ganî her şertî de heqê sîyasî, ekonomîk û komelkî yê cinîyan bi têkoşînê hemparî bêrê pawitene.
- Konferanse de veng dîyayo ke lezabez Kurdîstan de konferansa neteweyî bêro viraştene, yewîya neteweyî bêro pêtkerdene û cinî nê prosesî de sey pêşeng ca bigîrê.
- Ganî bi amancê rojevekerdişê problemanê hemparan (koç, şîdet, ekonomî, kultur û ziwan ûsn.) çarçeweya plananê demderg û demkilman de semîner û grûbê xebatan bêrê plankerdene.
- Ganî seba awankerdişê vîrê hemparî yê cinîyan xebatê arşîvî bêrê kerdene.
- Ganî platform seba azadkerdişê cinîyanê êzîdîyan ke heta ewro sey komelêk 72 ferman/qirkerdişî ciwîyayî, sewîyeya neteweyî û mîyanneteweyî de xebatan bikero.
- Nika ra pey konferans, semîner û panelê ke yenê viraştene, tede hîrê lehçeyê kurdkî (kurmancî, soranî û kirmanckî) do ca bigîrê.
- Platform seba felaketê laserî ke Çemçemal û Kerkuk de qewmîya û bîyo sedemê vindîkerdişê canî, serweşîye wazeno, dejê keyeyan pare keno û heto bîn ra vengdayîşê hetkarîye keno.
