Kongreya Demokratîke ya Şaran (HDK) encamnameyê konferansê xo yê bi sernameyê “Newera Sosyalîzm”î ke tarîxanê 8-9ê teşrîna peyêne de ame kerdene, eşkera kerd.
Kongreya Demokratîke ya Şaran (HDK) encamnameyê konferansê xo yê bi sernameyê Newera Sosyalîzmî ke tarîxanê 8-9ê teşrîna peyêne de ame kerdene, eşkera kerd. Encamname de ame vatene ke erjnayîşê Rayberê Şarê Kurd Abdullah Ocalanî dewrê ke şerê emparyalîstî û polîtîkayê qirkerdişî xorî bîyî de mabênê şaran de semedê paştdayîş û têkoşînê hemparî îmkanê neweyî afirnayî.
Konferans de ame vatene ke ganî sosyalîzm roja ma de newera bêro bedilnayene û munaqeşeyî binê sernameyanê sey “Dewlete, Demokrasî, Sinif û Nizdibîyayîşo Sosyalîst,” “Tecrubeyê Tarîxî û Pratîkê Demokrasîyî” û ”Perspektifê Ronayoxî yê Semedê Sosyalîzmî” de ameyî kerdene.
Encamname de ame vatene ke kapîtalîzm û sîstemê camêrd serdestî merdimîye ancena mîyanê rijnayîşî, vera ney sosyalîzm aktuelîya xo pawena. Tewrbîyayoxan vat têkoşîno sosyalîst ganî bi înîsîyatîfanê cayîyan û tewrbîyayîşê dînamîkanê kolektîfî yê cîya cîyayan bêro xurt kerdene. Modelê konferderalîzmê demokratîkî yê Şorişê Rojawanî nê hetî ra sey modelî ame mojnayene.
Encamname de reyna ame vatene ke marksizîm sîstemêko nêbedilîyeno nîyo, fîkro dînamîko ke rexnekerdişî rê akerde yo, femînîst û têgêrayîşê azadîya cinsîyetî yê komelkî zî sey parçeyê têkoşînê azadîye yê ameyî hesibnayene. Ame vatene ke tecrubeyê Têgêrayîşê Azadîye yê Kurdîstanî û pêşnîyazê Rayber Apoyî paştî danê têkoşînê hemparî yê bindestan ê dinya.
Encamname de tewr peynî de ame vatene ke “Ya sosyalîzm ya barberîye” û ame îfadekerdene ke sosyalîzm semedê estbîyayîşê merdimîye alternatîfêko ke ganî nêro peydeşetene.
