Pîrozbayîya Newroza Erzinganî de Parlamenteranê DEM Partîye Ayten Kordu û Celal Firatî û endamî Komîteya Rayberîya Merkezî yê EMEP’î Orhan Kurulî qisey kerd. Qiseykerdişan muhîmîya Newroze ser vinertî û mesajê aştî û demokrasi dayî.
Erzingan de bi şîarê “Newroza Azadî û Yewîya Demokratîk” Newroze ame pîrozkerdene. Şaristanokê Ulularî de kişta keyeyanê TOKÎ de pîrozbayîya Newroze ame viraştene. Pîrozbayî de temsîlkarê partîyanê sîyasî û sazgehê komelî ra xeylê kesî ameyê têhet. Warê Newroze de pankartê “Welat de demokrasî, herême de aştî” ameyê aleqnayene. Programê Newroze seba vîrardena cangorîyanê aştî û demokrasî deqîqeyêk rêzgirewtiş ame dest pêkerdene.
Çareserkerdişê meseleya kurdî
Endamê Komîteya Rayberîya Merkezî yê EMEP’î Orhan Kurul vîr vist û vat meseleya kurdî 1ê teşrîna verêne 2024 ra nat bi mecrayê ke bîne de yena munaqeşekerdene. Hetê kurdan gamêke ameyê eştene vîr ardî, la hetê dewleta ra tena rapor ame hedrekerdene uca de zî meseleya kurdî sey ‘teror’ pênase kerda. Meseleya kurdî seba ke serê esasê heqanê têduştîye de çareser bibo ganî ma têkoşînê xo berz bikerê weko bîn çareyê ma çinîyo.
‘Ganî ma destek bidê nê prosesî’
Parlamenterê Stenbolî yê Partîya Têduştî û Demokrasî ya Şaran (DEM Partî) Celal Firatî, bale ante serê prosesê Aştî û Komelê Demokratîk û roşanê heme kesan pîroz kerd û vat: “Heme şaran, elewîyan, sunîyan, tirkan, kurdan, cîyayî nêkerê mîyanê înan seba nê heran heme zî deydarê wisarî yê” Wisar tena xoza de nîyo, zerrîya însanî de dest pêkeno. Eke zerrîya ma de xerez bibo wisar nîno.”
Vengdayîşê têrîameyîşê dewlete kerd
Parlamentera Dêrsimî yê DEM Partî Ayten Kordu qiseyê xo de vat: “Newroze seba ma vera zaliman rojêka tarîxîya û sembolê xoverdayîşê mazlûman o. Hem heqîqetê ma de hem zî xoverdayîşê ma de cayê xo est o. Naye ra ma vanê adirê Newroze; adirê azadî û demokrasî yo. Nê welatî de aştî do bi destê şaran virazîyo.”
Adirê Newroze ciwanan wekerd
Badê qiseyan pêşengîya ciwanan de adirê Newroze ame wekerdene. Hunermend Hasan Alî Sezerî deyîrî vatî û girseye dorê adirê Newroze govende girewte.
