Rojnameger Farûk Balîkçi ke badê komkiştişî şîbî Helebce, qurbanîyê Komkiştişê Helebce ardî vîrî û vat: “Helebce vîrardiş o, no vîrardiş pê dejan vîrê şarê kurdan de sey birînêka xorîne ca gêna ke vîrî ra nêşina.”
16ê adare 1988î de bajarê Helebce yê Başûrê Kurdîstanî de hêrişê kîmyewî yê rejîmê Baasî de sîyasetêko sîstematîk ê qirkerdişî ame ramitene. Hêrişan de tewr kêmî 5 hêzar kurdî merdî û tewr kêmî 10 hêzar kesî zî birîndar bîyî.
“Nêbîyayîşê statuyê kurdan bî sebebê bêvengîye”
Balikçiyî vat: “Senî ke bombeyê atomî ke Nagazakî û Hîroşîma ser o ameyê eştene dinya de vengêko gird da, vera Komkiştişê Helebce zî hende bêhîsîye û bêxemîye virazîyayî. Eslê xo de sebebê na bêvengîye nêbîyayîşê statuyê kurdan bî. Pê heme çîyan zî no nêzdîbîyayîş ne merdimane yo, ne exlaqîye û ne zî wîjdanî yo.”
“Her kuçeyî ra, her keye de û her kuncike de dejêk est bî”
Balikçiyî vat ke çend serrî badê komkiştişî şîyo Helebce: “Bi rayberîya pêşmergeyan gama ke ez şîya Helebce, çend serrî vîyartbî zî rêçê komkiştişî hîna dîyar bîyî. Vernîya keyeyêk de 11 nameyan ke dêsî ser o nuşte bîyê, bala mi ante xo ser. Cinîya kurde ya wayîra keye nameyê merdimanê xo yê ke komkiştişî de amebî kiştene, dêsî ser o nuştbî. Her kuçeyî ra, her keye de û her kuncike de dejêk est bî.”
“Vera bêcezayîye vîrardişê ma xoverdayîşê ma yo tewr gird o”
Balikçiyî vat: “Wesayîtanê tewr bihêzan ê xoverdayîşî yê vera şîdetî ra yew zî vîr o. Vera sîstemê bêcezayîye de vîrardişê ma xoverdayîşê ma yo tewr gird o. Destûrdayîşê qutbîyayîşê vîrî yeno a mana ke merdim bîyo hemkarê sûcî. Her dejo ke vîrî ra şino talûkeyê newebîyayîşî mîyanê xo de hewêneno. Senî ke darêka bêreya nêşêna pay ser o bimana, komelêko bêvîr zî mehkumê eynî encamî yo. Vîr metodêkê xoverdayîşî yo. Rojnamegerî şahîdê tarîxî yê. Coka seba gandarkerdişê vîrî ganî hevalê ma yê ciwanî vîrê tarîxî tim gandar verdê.”
