Sûrîye de rijyayişê rejîmê BAAS’î ra pey verba Elewîyan hêriş û zilmî zêdîyayê. Babete ser FEDA beyanetêk da û vat ke ganî pêroyîya mîyanêneteweyî û neteweyî verba qirkerdişê Elewîyan de bêveng nêmanê
Federasyonê Elewî yê Demokratîke (FEDA) Sûrîye de qirkerdişê Elewîyan ser o beyanetêko bi nuşte da. Beyanat de wina ame vatiş: “Verê çimê heme Dinya de bi hakîmeyetê HTŞ’î, çeteyê DAIŞ’î Elewîyan qir kenê, no zî sucê merdîmeyî yo. Elewîyan ra hêriş tena fizîkî nê, hetê tarîx, kultur û bawerî ra zî yeno kerdiş. No îxlalê pêameyişê mîyanêneteweyî yo.”
Beyanat wina dewam kerd: “Komelê mîyanêneteweyî û medya, verba nê qirkerdiş û wehşetî de bêveng manenê. Xususî Elewîyê Erebî yenê qirkerdiş. Ma no qirkerdiş nalet kenê û heme sazîyê mîyaneteweyî û neteweyî ra veng danê, wa bêveng nêmanê. Ganî Elewîyê Ereb, Tirkmene û Ermenî, Durzî û Kurdan zî xobixo îdare bikê û bi ziwanê dayîke perwerde bivînê.”
