Bi wesîleya çarine serrgêra qetilkerdişê Denîz Poyraz, maya aye Fehîme Poyraz qisey kerd û dîyar kerd ke seba ke aştî biba, ganî kiştoxê Denîz Poyraz bêrê vînayîş û şikdaran ra hesab bêro perskerdiş.
Qetilkerdişê Denîz Poyraz ke 17ê hezîrana 2021î de hêrişê şikdar Onur Gencerî yê hemverê awanîya Partîya Demokratîke ya Şaran (HDP) ê Îzmîrî de ameye qetilkerdiş, 4 serrî vîyartê. Roniştişo 6. yê dewa de ke 27ê kanûna 2022î de ame vînayîş, şikdar Onur Gencer sucê ‘kiştişê kesan ê plankerde’ cezaya muebeto giran, sucê ‘zerar dayo malî’ 4 serrî, sucê ‘binpaykerdişê destnêdayîşê awanî’ 2 serrî û sûcê ‘muxalefetê qanûnê çekan’ ra ey rê 3 serrî ceza amebî birnayîş. Avûkatê keyeyê Denîz Poyraz semedê têkiliyê şikdar ê rêxistinan reyde, wezîfedarê îstîmlakî yê qirkerdişî reyde zemîn hazir kerdo, bêrê cigêrayîş dewa akerdbî.
Maya Denîz Poyraz, Fehîme Poyraz bi wesîleya serrgêra qetilkerdişê Denîz Poyraz ajansê JIN NEWS’î rê qisey kerd û bale ant vengdayîşê Rayberê Şarê Kurdî Abdullah Ocalanî ser o û va, seba caameyîşê aştî ganî şikdaro ke Denîz Poyraz qetil kerde, bêrê vînayîş û ci ra hesab bêro perskerdiş. Fehîme Poyraz dîyar kerd ke pêwa her çî ê vanê aştî û va, semedo ke proses dewam bikero, ganî Abdullah Ocalan azad bibo.
‘Ma azadîya serekê xo wazenê’
Fehîme Poyraz wina va: “Hedîse ser o ra 4 serrî vîyartê la dejê ma hema zî teze yo. Ma tu wext xo vîr ra nêkenê. Vengdayîşê Birêz Ocalanî muhîm o. Ma azadîya serekê xo wazenê. Ma aştî wazenê. Ma nêwazenê tu kes bimro. Ez wazena ke kiştoxê kênaya mi bêrê vînayîş û ci ra hesab bêro perskerdiş. Dewlete zî vana aştî la hêrişan domnena. Ma nêwazenê gonî birijîya.”
‘Ganî raştî vejîyê orte’
Fehîme Poyraz tewr peyên wina vat: “Şikdarî ra vato ‘çîyêkê to est o?’. Vera ke ma ra bipersê, ey ra pers kerdo. Eke aştî wazenê ganî ewil persê ‘kiştoxê Denîze kam o’ bêro perskerdiş. Tena Denîze nê, bi seyan gedeyê ma sey Denîze şehîd kewtî. Ma wazenê nê ser de vinderê. Wa sebebê qetilkerdişê Denîze bêro perskerdiş. Ma aştîyêka zerrî ra wazenê. Ganî girewteyê nêweşî bêrê veradayîş. Semedê aştîyêka bi rûmete ganî nê bêrê ca. Hêvîya ma serekê ma yo. Ez venga pêro kesan kena ke tewrê yadkerdişê serrgêra Denîz Poyraze bibê. Ma yewbînan rê wayîr vejîyê, ma bibê yew. Eke ma bibê yew, do tu kes nêeşko vernîya ma bigîro.”
