Artêşa Îsraîlî eşkera kerd ke, operasyonêk de Fermandarê Yewîneyanê Fuzeyanê Balîstîk ê Herêma Kirmanşahî Mokarram Azîmî û Berpirsîyarê Fînansî Cemşîd Eşaqî ameyî kîştene.
Artêşa Pawitişî ya Îsraîlî (IDF), bi eşkerayîyêk serê keyepelê xo yê fermî de eşkera kerd ke, herêma Kirmanşahî de vera hêzanê Îranî operasyonêk viraşto. Eşkerayî de ame dîyarkerdene ke, nê hêrişanê nuqteyî de Fermandarê Merkezî yê Yewîneyanê Fuzeyanê Balîstîk Mokarram Azîmî ameyo kîştene.
‘Berpirsê hêrişanê serê Îsraîlî bi’
Eşkerayî de ame vatene ke Azîmî berpirsê operasyonanê yewîneyanê herêma Kirmanşahî bi û bi desan fuzeyê balîstîkî eştbî Îsraîlî. Artêşa Îsraîlî dîyar kerd ke no operasyon seba qelskerdişê qewetê fuzeyanê rejîmê Îranî ameyo kerdene.
Berpirsê Aborî yê Pasdaranê Şorişî, Eşaq ame kiştene
Sewbîna IDF’yî bi mesajêko bîn eşkera kerd ke, Fermandarê qerargehanê petrolî yê Pasdaranê Şorişî Cemşîd Eşaqî zî encamê operasyonêkê hewayî de ameyo kiştene. Eşkerayî de ame zanayene ke Eşaqî qerargehanê petrolî ra berpirsîyar bîyo û beşê aborî yê hêzanê rejîmî rayra berdêne. Reyna IDF’yî îdîa kerd ke Eşaqî fînanskerdişê programanê fuzeyan û grûbanê Îranî yê Rojhelatê Mîyanî de zî wayîrê wezîfeyêko muhîm bi.
‘Xeylê fermandarê bînî zî ameyî kîştene’
Eşkerayî de ame vatene ke operasyonêko bîn ê hemwext de, xeylê fermandarê tabûrî yê eyn yewîneyî zî ameyê kiştene. Ame dîyarkerdene ke nê fermandarî berpirsê eştişê bi desan fuzeyan bîyê ke vakurê rojavayê Îranî ra hetê Îsraîlî ser o ameybî eştene.
No operasyon, sey derbeyêka girane fermandarîya fuzeyan a Îranî û binawanîya ci ya leşkerî ya herêmanê rojava û mîyanî de yena erjnayene.
